តារាសម្ដែងស្រីដ៏ល្បីឈ្មោះ Pooklook ត្រូវបានប្រជាពលរដ្ឋថៃធ្វើការតវ៉ាយ៉ាងខ្លាំងលើបណ្ដាញសង្គមដោយសារតែកញ្ញាបានបង្ហោះលើបណ្ដាញសង្គមចំពោះករណីម្ដាយដួលក្នុងបន្ទប់ទឹកត្រូវបញ្ជូនទៅមន្ទីរពេទ្យតែគ្មានបុគ្គលិកពេទ្យគ្រប់គ្រាន់ជួយម្ដាយរបស់ខ្លួន។ ប៉ុន្តែក្រៅពីមិនទទួលបានការយល់ចិត្តនិងរំលែកក្ដីទុក្ខចំពោះរឿងម្ដាយហើយនោះ តារាស្រីរូបនេះ បែរជាត្រូវមហាជនជេរស្ដី និងបន្ទោសយ៉ាងខ្លាំងចំពោះទង្វើរបស់កញ្ញាទៅវិញ។
យោងតាមសារព័ត៌មាន Matichon កញ្ញា Pooklook បានបង្ហោះសំណេរលើ IG ថា៖ ម្ដាយរបស់កញ្ញាដួលហើយត្រូវបានបញ្ជូនទៅមន្ទីរពេទ្យ តែបុគ្គលិកពេទ្យមិនមានអ្នកណាខ្នះខ្នែងក្នុងការជួយសង្គ្រោះម្ដាយខ្លួនឡើយ ថែមទាំងដៀមដាមមន្ទីរពេទ្យនិងគ្រូពេទ្យឱ្យមានចិត្តវិញ្ញាណជាគ្រូពេទ្យផង បើមិនស្រលាញ់អាជីពទេគួរតែលាឈប់។
ក្រោយសំណេររបស់កញ្ញាបានបង្ហោះស្រាប់តែមានក្រុមអ្នកគាំទ្រគ្រូពេទ្យបាននាំគ្នាបង្កើត Hashtag ឈ្មោះរបស់កញ្ញាជាភាសាថៃនិងបង្ហោះលើ Twitter រហូតក្លាយជារឿងដែលមានមនុស្សចូលមកបន្ទោសនិងមិនគាំទ្រទង្វើរបស់តារាស្រីរូបនេះយ៉ាងច្រើនរហូត Trending លើ Twitter ក្នុងនោះអ្នកលេងអ៊ិនធឺណិតនិងបុគ្គលិកសុខាភិបាលបានចេញមកឆ្លើយតបចំពោះករណីនវថា «ក្នុងស្ថានការណ៍កូវីដ-១៩ កំពុងរាតត្បាត មន្ទីរពេទ្យឯកជនមួយភាគធំត្រូវបន្ថយចំនួនមនុស្សធ្វើការឱ្យនៅតិច ហើយបើករណីត្រូវធ្វើ CPR អ្នកជំងឺចាំបាច់ត្រូវតែស្លៀកឈុត Full PPE ជាមុនសិន មិនថាអ្នកជំងឺកើតឧប្បត្តិហេតុក៏ដោយ ខណៈមន្ទីរពេទ្យខ្លះទៀតមិនមានក្រុមសង្គ្រោះ EMS តែអាចទទួលអ្នកជំងឺសង្គ្រោះបន្ទាន់បានគ្រប់ពេលវេលា»។
មិនទាន់អស់ត្រឹមប៉ុណ្ណេះនោះទេ ក៏មានផេកមួយបានចេញមកនិយាយពីហេតុការណ៍ដែលបានកើតឡើងនោះទៀតដែរថា Pooklook បានទាក់ទងហៅរថយន្តសង្គ្រោះបន្ទាន់ តែរថយន្តសង្គ្រោះទើបតែដឹកអ្នកជំងឺកូវីដរួចទើបមិនអាចចេញទៅទទួលបាន ដូច្នេះកញ្ញាបានបើកឡានមកដោយខ្លួនឯង ដោយបើកឡានចូលតាមផ្លូវបញ្ច្រាសចូលមន្ទីរពេទ្យ ពេលមកដល់ចតឡានជិតនឹងបង្កាន់ដៃខាងមុខមន្ទីរពេទ្យមិនអាចបើកទ្វារពេលគ្រូពេទ្យឱ្យចតម្ដងទៀតក៏មិនព្រមថែមទាំងឱ្យយកលើកហ្វ្រង់ការរំលងឡានមកលើកម្ដាយចេញពីឡាន រួចហើយ ពេលចូលដល់ក្នុងមន្ទីរពេទ្យខណៈក្រុមគ្រូពេទ្យកំពុងធ្វើ CPR ពេលបើកទ្វារចូលមកក៏ស្រែកដាក់ពេទ្យនិងគិលានុបដ្ឋាកនាយិកា ព្រមទាំងថតវីដេអូគ្រប់ពេលវេលាទៀតផង។
រឿងហេតុកាន់តែក្ដៅឡើងនៅពេលតារាស្រីរូបនេះចេញមកផុសអរគុណព្រះជាម្ចាស់នៅពេលដែលម្ដាយខ្លួនដែលបាត់ដង្ហើមហើយនោះឱ្យត្រលប់មកមានដង្ហើមឡើងវិញ តែមិនបានអរគុណដល់ក្រុមគ្រូពេទ្យដែលខ្នះខ្នែងជួយម្ដាយខ្លួន ស្រាប់តែអ្នកលេងបណ្ដាញសង្គមបានបន្តចេញមកលើកទឹកចិត្តនិងផ្ដល់កម្លាំងចិត្តចំពោះក្រុមគ្រូពេទ្យនៅបន្ទប់សង្គ្រោះបន្ទាន់ដែលអាចជួយធ្វើ CPR ម្ដាយរបស់ Pooklook ដែលឈប់ដកដង្ហើម១៥នាទីហើយឱ្យត្រលប់មកដកដង្ហើមបានវិញថែមទៀតផង។
ខណៈនេះភាគីតារាស្រីខាងលើកំពុងស្ថិតក្នុងភាពស្ងៀមស្ងាត់មិនទាន់ចេញមកស្រាយឬមានសកម្មភាពប្រតិកម្មណាមួយតបតបចំពោះការជេរនិងរិះគន់ចំពោះទង្វើកញ្ញានៅឡើយនោះទេ៕