ហុងកុង – តារាសម្ដែង និងតារាចម្រៀងល្បីចិនហុងកុង លោក លីវ តឺហួរ (Andy Law) បានបង្ហោះឃ្លីបវីដេអូខ្លីមួយនៅលើ Douyin (Tiktok) ដែលឃ្លីបនោះមានរយៈវេលាខ្លីត្រឹមតែ៣៣វិនាទីប៉ុណ្ណោះមានចំនួនរាប់លាន។
វីដេអូដែលកំពុងតែល្បីល្បាញ (Viral) នេះត្រូវបានតារាសម្ដែង តារាចម្រៀងនិងជាផលិតករភាពយន្តបង្ហោះនៅលើបណ្ដាញសង្គម Douyin ឬ TikTiok។ វីដេអូដែលលោកបង្ហោះហើយដាក់ឈ្មោះឃ្លីបនោះថា «១ឧសភា នៅមានតទៀត» ដោយពាក្យនេះលោកអាចនឹងសំដៅដល់ទិវាពលកម្មអន្តរជាតិ ជាថ្ងៃឈប់សំរាកដើម្បីរំលឹកដល់សារសំខាន់នៃក្រុមមនុស្សដែលមានអាជីពប្រើកម្លាំងទូទាំងសកលលោក។
នៅក្នុងឃ្លីបវីដេអូនោះតារាសម្ដែងវ័យ៦០ឆ្នាំ បានពាក់ម៉ាសអនាម័យនិងតុបតែងខ្លួនបែបសាមញ្ញា កំពុងតែប្រើប្រាស់ឧបករណ៍ជូតសំអាតផ្ទះគ្រប់កន្លុតកន្លៀតយ៉ាងចំណាន មុននឹងងាកមកញញឹមហើយលើកដៃដាក់កាមេរ៉ា។
ក្រោយវីដេអូនេះបង្ហោះចេញទៅមានអ្នកលេងអ៊ីនធឺណិតជាច្រើនបង្ហាញការចាប់អារម្មណ៍និងភ្ញាក់ផ្អើលចិត្ត ដែលឃើញលោកបោសសំអាតនិងជូតផ្ទះដោយខ្លួនឯង ព្រោះតាមឋានៈរបស់លោកមិនចាំបាច់ត្រូវធ្វើខ្លួនឯងក៏បាន។
មានអ្នកលេងបណ្ដាញសង្គមម្នាក់បាននិយាយថា បើសិនកំពូលតារាល្បីដូចជាគេហើយនៅធ្វើការងារផ្ទះ មនុស្សទូទៅគ្មានរឿងអីត្រូវម៉ួម៉ៅក្ដៅក្រហាយទៀតទេ។ ដោយឡែកមានអ្នកគាំទ្រម្នាក់បានសម្ដែងការកោតសរសើរចំពោះតារារូបនេះថា តារាល្បីអាចប្រើប្រាស់ដងជូតផ្ទះយ៉ាងចំណាន ដូច្នេះបានសេចក្ដីថាលោកធ្លាប់ជូតផ្ទះច្រើនលើកច្រើនសារហើយ ខណៈដែលអ្នកគាំទ្រម្នាក់ទៀតបានសរសើរចំៗថា «សូម្បីតែពេលជូតផ្ទះ គាត់មើលទៅនៅតែសង្ហា»
ប្រភព៖ 继续五一 – 抖音 (douyin.com)