ពេញមួយប្រវត្តិសាស្ត្របាល់ទាត់ មានកីឡាករបាល់ទាត់ឆ្នើមៗជាច្រើនដែលចូលចិត្តគ្រឿងស្រវឹង ហើយតែងតែផឹកជាប្រចាំដូចជា៖ Peter Crouch, David Luiz, Lukas Podolski, Yaya Touré, Wayne Rooney, Hugo Lloris ជាដើម។
ជាពិសេសកីឡាករដែលប្រកបអាជីពនៅក្នុងក្របខណ្ឌ Bundesliga លីគកំពូលរបស់ប្រទេសអាល្លឺម៉ង់ ដោយសារនៅទីនោះគេតែងតែប្រារព្ធពីធីបុណ្យស្រាបៀរអុកថូប៊ើរហ្វេស (Oktoberfest) ហើយកីឡាករទាំងអស់ រួមទាំងគ្រូបង្វឹកនាំគ្នាផឹកស្រាយ៉ាងសប្បាយរីករាយ។
ជារឿយៗមិនថាក្រុមបាល់ទាត់ FC Bayern Munich ឬ Borussia Dortmund នៅពេលពួកគេក្លាយជាម្ចាស់ជើងឯក Bundesliga គឺគេនាំគ្នាជួបលៀងនៅក្នុងកីឡដ្ឋានតែម្តង ដោយខ្លះផឹក និងខ្លះទៀតយកស្រាចាក់លើគ្នាទៅវិញទៅមក។
សំណួរដែលចោទសួរញឹកញាប់! តើគ្រឿងស្រវឹងពិតជាប៉ះពាល់ដល់ការលេងរបស់កីឡាករកម្រិតណា?
យោងតាមការចុះផ្សាយរបស់ Bleacher Report បានលើកឧទាហរណ៍ច្បាស់ៗថាអំឡុងការប្រកួត FIFA World Cup 2010 នៅអាហ្រ្វិកខាងត្បូង អ្នកចាត់ការទូទៅរបស់ក្រុមជម្រើសជាតិអង់គ្លេស គឺលោក Fabio Capello បានអនុញ្ញាតឲ្យកីឡាកររបស់ខ្លួនផឹកស្រា ក្រោយលេង២ប្រកួតបើកឆាកមិនអាចស្វែងរកជ័យជម្នះ ដោយស្មើ សហរដ្ឋអាមេរិក ១-១ និងស្មើ អាល់ហ្សេរី ០-០ ដើម្បីរំងាប់អារម្មណ៍របស់ពួកគេ។
ជាលទ្ធផលនៅប្រកួតទី៣គឺក្រុមជម្រើសជាតិអង់គ្លេស អាចយកឈ្នះជាលើកដំបូងលើក្រុមស្លូវេនី ១-០ មានឈ្មោះទៅលេងវគ្គ១៦ក្រុមចុងក្រោយ បន្ទាប់ពីស្ថិតនៅលេខរៀងទី២ ស្មើពិន្ទុគ្នាជាមួយសហរដ្ឋអាមេរិក។
ទោះបីជាកីឡាករផឹកគ្រឿងស្រវឹងពិតមែន ប៉ុន្តែការបង្ហាញសមត្ថភាពនៅលើទីលានរបស់ពួកគេហាក់មិនអន់ថយឡើយ មានតែកាន់ឡើងខ្លាំងជាងមុខ ទាំងនេះគឺសរបញ្ជាក់ឲ្យឃើញថាមិនមែនគ្រឿងស្រវឹងឡើយដែលធ្វើឲ្យប៉ះពាល់ដល់ការលេងរបស់កីឡាករ មានតែការហ្វឹកហាត់, គោរពវិន័យ, ស្តាប់គ្រូ បូករួមជាមួយទេពកោសល្យពីកំណើត និងផឹកគ្រឿងស្រវឹងដោយការទទួលខុសត្រូវទេ«មិនលើសកំរិតខ្លាំង» ទើបអាចអភិវឌ្ឍខ្លួនទៅជាកីឡាករល្អមួយរូបបាន៕
នេះជាមតិយោបល់ខ្ញុំទេ ចុះអ្នកវិញ?
ប្រិយមិត្តត្រយង ដែលចង់ចែករំលែកនូវបទពិសោធល្អៗ និងស្ថានភាពសង្គមនានា ព្រមទាំងរឿងរ៉ាវស្នេហាផ្សេងៗ ក៏អាចផ្ញើអត្ថបទមកចុះផ្សាយនៅសារព័ត៌មានត្រយងបាន ដោយទាក់ទងមកតាមរយៈលេខទូរសព្ទ ភ្ជាប់នឹងតេឡេក្រាមដូចខាងក្រោមនេះ៖
- ០១២ ៧៨៧ ៦៦៣
- ០១២ ៥៦៧ ៤៦៨
- ០៩៩ ៥៨៨ ៨៨០