ជា ស្រីនា គឺជា Influencer ឬជាតារាអនឡាញដ៏មានប្រជាប្រិយភាពមួយរូបនៅក្នុងស្រទាប់យុវវ័យ។ ស្រីនា បានចាកចេញពីកម្ពុជាដើម្បីទទួលសញ្ញាប័ត្របញ្ចប់ថ្នាក់បរិញ្ញាបត្រនាសហរដ្ឋអាមេរិក។ ខណៈកំពុងស្ថិតនៅលើទឹកដីដ៏ស៊ីវិល័យស្រាប់តែ ស្រីនា បានបង្ហោះសំនេរខ្លីមួយភ្ជាប់ដោយពាក្យថា «នឹក» ដែលពាក្យនេះហើយធ្វើឱ្យអ្នកគាំទ្រពិសេស អ្នកShip គិតថាកញ្ញា នឹកដល់ លោក ហេង វិសាល។
នៅព្រឹកថ្ងៃទី១៧ ខែឧសភានេះ ស្រីនា បានបង្ហោះរូបខ្លួនមួយសន្លឹក ព្រមទាំងភ្ជាប់នូវសំនេរចាក់ដោតអារម្មណ៍ថា៖ «មកដល់កន្លែងស្អាតៗ ចេះតែនឹកដល់អ្នក»។ ពាក្យពេចន៍ដ៏សែនសាមញ្ញានេះត្រូវបានអ្នកគាំទ្ររបស់ស្រីតូចច្រឡឹងរូបនេះនាំគ្នាកាត់យល់ថាកញ្ញាអាចនឹងសំដៅដល់លោក ហេង វិសាល ដែលជាដៃគូដ៏ល្អនិងស៊ីសង្វាក់គ្នារបស់កញ្ញា។
បើត្រឹមតែស្រីនា ផុស Caption ខាងលើនោះធ្វើឱ្យហ្វេនសង្ស័យទៅហើយ ស្រាប់តែ៨នាទីក្រោយ ហេង វិសាលបានចេញមកផុស Caption មួយដែរថា «តឹងទ្រូងណាស់យាយ» ដែលសំនេរនេះត្រូវបានអ្នកខ្លះយកទៅប្រែថា «នឹកអូនឡើងតឹងទ្រូង»។
ថ្វីត្បិតតែសំនេរខ្លីដែលមហាជនគិតថាគឺជាការបង្ហាញអារម្មណ៍នឹកដល់គ្នានោះក្ដីប៉ុន្តែសាមីខ្លួន ហេង វិសាល ឬស្រីនា មិនបានចេញមកបកស្រាយ ឬក៏ឆ្លើយតបចំពោះការយល់ឃើញរបស់មហាជននោះឡើយ។
ស្រីនា បានបញ្ចប់ថ្នាក់បរិញ្ញាបត្រជំនាញ វិទ្យាសាស្ត្រពាណិជ្ជកម្ម ពីសកលវិទ្យាល័យ «American University of Phnom Penh» ដោយនិស្សិតដែលបញ្ចប់ការសិក្សានៅសាលានេះនឹងទទួលបានបរិញ្ញាបត្រពីសកលវិទ្យាល័យដៃគូគឺ The University of Arizona នៅសហរដ្ឋអាមេរិកដូចគ្នា៕