ភ្នំពេញ៖ បុរសម្នាក់មិនស្គាល់អត្តសញ្ញាណជិះរថយន្តមិនចាំម៉ាកគ្រឿងដកអាវុធខ្លីចេញពីរថយន្តបាញ់ចំនួន ៣គ្រាប់ រួចគេចខ្លួនចេញពីកន្លែងកើតហេតុបាត់ស្រមោល។ ហេតុការណ៍នេះកើតឡើងនៅវេលាម៉ោង ៣ និង ៤៥ នាទីយប់ទៀបភ្លឺឈានចូលថ្ងៃទី ១៨ ខែឧសភា ឆ្នាំ ២០២២ ស្ថិតតាមបណ្ដោយផ្លូវ ៤៣២ នៅក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។
បើតាមប្រភពព័ត៌មានពីអ្នកឃើញហេតុការណ៍បានឲ្យបានដឹងថា៖ នៅមុនពេលកើតហេតុគេបានឃើញរថយន្តមួយគ្រឿង មិនចាំស្លាកលេខ បើបរដោយបុរសម្នាក់ មិនស្គាល់អត្តសញ្ញាណ បានធ្វើដំណើរតាមបណ្ដោយផ្លូវ ៤៣២ ក្នុងទិសដៅពីកើតទៅលិច ខណៈពេលដែលធ្វើដំណើរមកដល់ត្រង់ចំណុចកើតហេតុ បុរសរូបនោះក៏បានដកអាវុធខ្លី មិនស្គាល់ម៉ាកចំនួន១ ដើមនិងបានធ្វើសកម្មភាពបាញ់ចំនួន ៣ គ្រាប់ តែជាសំណាងល្អមិនបានត្រូវអ្នកដំណើរ នឹងអ្នកនៅក្បែរកន្លែងកើតហេតុទេ រួចបេីករថយន្ដ គេចខ្លួនចេញពីកន្លែងកើតហេតុ បាត់ស្រមោល។
ក្រោយពីកើតហេតុ ក៏មានវត្តមានរបស់កម្លាំងសមត្ថកិច្ចមូលដ្ឋាន សហការជាមួយនឹងកងរាជអាវុធហត្ថខណ្ឌចំការមន បានចុះមកដល់និងទីតាំងកន្លែងកើតហេតុ ធ្វើការត្រួតពិនិត្យ ក៏ប្រទះឃើញសំបកគ្រាប់ ចំនួន ៣គ្រាប់នៅកន្លែងកើតហេតុ។
សមត្ថកិច្ចមូលដ្ឋាន និងកងរាជអាវុធហត្ថខណ្ឌចំការមន បានធ្វើការយកសំបកគ្រាប់ទាំងនោះ យកទៅរក្សាទុកដើម្បីធ្វើការស្រាវជ្រាវ បន្តស្វែងរកជនសង្ស័យ យកមកផ្តន្ទាទោសទៅតាមផ្លូវច្បាប់៕