ក្នុងជំនួបជាមួយឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នាថ្ងៃទី១៧ឧសភាម្សិលមិញ ឯកឧត្តម Jacques PELLET ឯកអគ្គរដ្ឋទូត នៃសាធារណរដ្ឋបារាំងប្រចាំនៅកម្ពុជា បានចាត់ទុកជាមោទកភាពបំផុតដែលកងម្លាំងមួកខៀវរបស់កម្ពុជា មានស្ត្រីរហូតដល់១៩%។
ឯកឧត្តមឯកអគ្គរាជទូតបានកត់សម្គាល់ជម្រាបឯកឧត្តម ហ៊ុន ម៉ាណែត ដោយចាត់ទុកភាគរយនៃការចូលរួមរបស់កងទ័ពមួកខៀវស្ត្រីកម្ពុជាជាមួយអង្គការសហប្រជាជាតិនេះ ថាជាប្រការល្អហួសពីការរំពឹងទុករបស់អង្គការសហប្រជាជាតិទៅទៀត ហើយថាកងកម្លាំងជាស្ត្រីទាំងអស់នេះ ពិតជាមានសារៈសំខាន់ និងកំពុងមានតម្រូវការច្រើន ដោយហេតុថា ភាគច្រើននៃជនរងគ្រោះនៅក្នុងបណ្តារដ្ឋដែលកំពុងមានសង្គ្រាម គឺជាស្ត្រី ដូច្នេះជាការចាំបាច់ដែលស្ត្រីអាចធ្វើការយ៉ាងជិតស្និទ្ធជាមួយស្រ្តី។
ឯកឧត្តម Jacques PELLET ក៏បានបង្ហាញការកត់សម្គាល់ដែរថាកម្ពុជាជាប្រទេសដែលមានបទពិសោធន៍យ៉ាងជូរចត់ក្នុងនាមជាជនរងគ្រោះដោយសារសង្គ្រាមរ៉ាំរ៉ៃ ប៉ុន្តែឥឡូវកម្ពុជាមានកងទ័ពប្រកបដោយសមត្ថភាពខ្ពស់ទាំងលើជំនាញ និងមានផ្នែកភាសាបារាំងរាប់ពាន់នាក់ដែលបាន និងកំពុងបំពេញភារកិច្ចនៅក្នុងបណ្តាប្រទេសជាច្រើនក្នុងពិភពលោកក្រោមឆ័ត្រអង្គការសហប្រជាជាតិ។
គិតចាប់តាំងពីឆ្នាំ២០០៦ រហូតមកដល់ពេលនេះ កម្ពុជាបានបញ្ជូនកងកម្លាំងរក្សាសន្តិភាពជាង៧ពាន់នាក់ទៅបំពេញបេសកកម្មមនុស្សធម៌ជាមួយអង្គការសហប្រជាជាតិ នៅក្នុងប្រទេសចំនួន៩ រួមមាន៖ ស៊ូដង់ ស៊ូដង់ខាងត្បូង, ឆាដ, លីបង់, ស៊ីរី, ម៉ាលី, អាហ្វ្រិកកណ្ដាល សាយប្រឺស និងយ៉េមែន ជាដើម។ បច្ចុប្បន្ន កម្ពុជាមានកម្លាំងកងទ័ពមួកខៀវជិត៨០០នាក់ ក្នុងនោះមាននារីជិត៨០នាក់ បាននិងកំពុងបំពេញបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ នៅប្រទេសលីបង់ ស៊ូដង់ ស៊ូដង់ខាងត្បូង ម៉ាលី និងសាធារណរដ្ឋអាហ្វ្រិកកណ្ដាល។
នៅក្នុងជំនួបនោះដែរ មេបញ្ជាការកងទ័ពជើងគោកកម្ពុជា ឯកឧត្តម ហ៊ុន ម៉ាណែត បានថ្លែងអំណរគុណសាធារណរដ្ឋបារាំង ដែលកន្លងមកតែងបានជួយជ្រោមជ្រែងកម្ពុជាលើកិច្ចការសំខាន់ៗជាច្រើនក្នុងនោះក៏រួមទាំង ការបញ្ជូនកងកម្លាំងថែរក្សាសន្តិភាពមកកម្ពុជា ការផ្តល់ជំនួយអភិវឌ្ឍន៍ និងអាហារូបករណ៍ដល់និស្សិតកម្ពុជា និងកិច្ចខិតខំប្រែងរបស់ សម្តេចតេជោ នាយករដ្ឋមន្ត្រី ក្នុងការរកដំណោះស្រាយសន្តិវិធីសម្រាប់បញ្ហាមីយ៉ាន់ម៉ា។
ឧត្តមសេនីយ៍ឯក ហ៊ុន ម៉ាណែត ក៏បានកត់សម្គាល់អំពីកិច្ចសហប្រតិបត្តិការទ្វេភាគីដ៏រឹងមាំ ដូចជាការផ្តល់ជំនួយយោធា និងការបណ្តុះបណ្តាលធនធានមនុស្សជំនាញយោធា, ជំនាញប្រតិបត្តិការថែរក្សាសន្តិភាព និងភាសាបារាំង ជាដើម ជាពិសេសការឧបត្ថម្ភគាំទ្រដល់សាលានាយទាហានសកម្ម និងមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម។
គួររម្លឹកថាកាលពីថ្ងៃទី ២៤ ខែឧសភា ឆ្នាំ ២០១៩ អង្គការសហប្រជាជាតិ (UN) បានបង្ហោះរូបកងទ័ពមួកខៀវជានារីរបស់កម្ពុជា ដើម្បីជាការអរគុណដល់វីរកងព័ពកម្ពុជា ទាំងស្ត្រី និង បុរស ដែលបានលះបង់យ៉ាងធំធេងស៊ូឃ្លាតឆ្ងាយពីគ្រួសារ ដើម្បីរក្សានូវសន្តិភាពពិភពលោក ដោយសរសេរនៅលើផ្ទាំងរូបភាពយ៉ាងដូច្នេះថា«ស្រ្តី និងបុស ដ៏ក្លាហាន មកពីប្រទេសកម្ពុជា បានចាកចេញពីក្រុមគ្រួសាររបស់ខ្លួន ហើយកំពុងបម្រើដើម្បីសន្តិភាព ជាមួយបេសកកម្មថែរក្សាសន្តិភាពអង្គការសហប្រជាជាតិ នៅជុំវិញពិភពលោក។ យើងអរគុណពួកគេសម្រាប់ការចូលរួម និងការលះបង់របស់ពួកគេ» ៕
