កូរ៉េខាងត្បូង – អតីតសមាជិកក្រុមចម្រៀង Girl’s Generation នាង Jessica កំពុងតែរងការរិះគន់ដោយសារតែនាងបានប្រូម៉ូតក្រុមចម្រៀងចិន ខណៈដែលអតីតមិត្តរួមក្រុមខ្លួនកំពុងត្រៀមចេញចម្រៀងសម្រាប់អាល់ប៊ុមអបអរខួប១៥ឆ្នាំរបស់ក្រុម SNSD (Girl’s Generation).
នៅថ្ងៃទី២០ ខែឧសភានេះ Jessica បានបង្ហោះវីដេអូនៅលើគណនី IG (Instagram) ផ្ទាល់ខ្លួនដើម្បីជួយផ្សព្វផ្សាយដល់ក្រុមចម្រៀងចិនដែលត្រលប់មកវិញសម្រាប់កម្មវិធី «Sisters Who Make Waves, Season3»។ ខណៈដែលអ្នកគាំទ្រមួយចំនួនរំភើបដែលបានឃើញ Jessica ត្រលប់មកឈរលើឆាកតន្ត្រីវិញ ប៉ុន្តែហ្វេនផ្សេងទៀតបែរជារិះគន់នាងដែលទៅប្រូម៉ូតក្រុមចម្រៀងចិនខណៈដែលអតីតសមាជិករួមក្រុមត្រៀមចេញចម្រៀងដូចគ្នា។
យ៉ាងណាមិញនេះមិនមែនជាលើកទីមួយឡើយដែលស្រីស្រស់ Jessica ទាក់ទាញបានការចាប់អារម្មណ៍ពីសាធារណជន ក៏ដូចជាបណ្ដាញសារព័ត៌មានព្រោះនៅខណៈដែលនាងសម្រេចចិត្តចូលរួមក្នុងកម្មវិធី «Sisters Who Make Wave, Season 3»។ កម្មវិធីនេះគឺជាកម្មវិធីដែលអនុញ្ញាតឱ្យតារាសម្ដែងនារីដែលស្ថិតក្នុងវ័យខ្ទង់៣០ និងលើសពីនេះចាប់ដៃគ្នាបង្កើតជាក្រុមចម្រៀង។
មិនត្រឹមតែ Jessica នោះទេដែលធ្វើឱ្យអ្នកគាំទ្រមានការភ្ញាក់ផ្អើលព្រោះអតីតសមាជិកក្រុមចម្រៀង Miss A កញ្ញា Fei និង Jia ក៏នឹងចូលរួមក្នុងកម្មវិធីនេះផងដែរ៕
ប្រភេទ៖ allkpop