លោកអាជ្ញាកណ្ដាល Janny Zikazwe ដែលផ្លុំកញ្ជែបញ្ចប់ការប្រកួតមុន៩០នាទីដល់ទី២ដងនោះ ត្រូវបានជ្រើសរើសជាអាជ្ញាកណ្តាលកាត់ក្តីការប្រកួតបាល់ទាត់ពិភពលោក FIFA World Cup 2022 ចុងឆ្នាំនេះនៅប្រទេសកាតារ។
កាលនោះក្រុមជម្រើសជាតិ ម៉ាលី ទទួលបាន៣ពិន្ទុយ៉ាងលំបាក ក្រោយយកឈ្នះក្រុមជម្រើសជាតិ ទុយនីស៊ី ក្នុងលទ្ធផល ១-០ ដែលជាស៊ុតបាល់ពិន័យ ១១ម៉ែត្រនៅនាទី៤៨ ដោយខ្សែប្រយុទ្ធ Ibrahima Kone នាយប់ថ្ងៃទី១២ ខែមករា ឆ្នាំ២០២២ ពានរង្វាន់ Africa Cup វគ្គជម្រុះពូល F។
រឿងចម្រូងចម្រាសបានកើតឡើងក្រោយលោកអាជ្ញាកណ្ដាល Janny Sikazwe សញ្ជាតិហ្សំប៊ី បានផ្លុំកញ្ជែបញ្ចប់ការប្រកួតមុន៩០នាទី ពោលគឺនៅនាទី ៨៩:៤៥, ហេតុការណ៏នេះធ្វើឲ្យលោក Mondher Kebaier ដែលជាគ្រូបង្វឹក ទុយនីស៊ី ព្រមទាំងជំនួយការរបស់លោក មិនអស់ចិត្តនោះឡើយ ដោយសារតែអំឡុងការប្រកួតគឺមានការសម្រាក ពិនិត្យ VAR, ផ្តល់បាល់ពិន័យ១១ម៉ែត្រចំនួន២ដង, ផ្តល់កាតក្រហមជូនកីឡាករចំនួន១រូបថែមទៀតផង។ ដូច្នេះគួរតែបន្ថែម ៥-៧នាទី មិនមែនបញ្ចប់មុន៩០នាទីនោះឡើយ។
តាមគម្រោងការប្រកួតពានរង្វាន់ពិភពលោក FIFA World Cup 2022 នឹងចាប់ផ្តើមឡើង នៅថ្ងៃទី២១ វិច្ឆិកា ដល់ថ្ងៃទី១៨ ខែធ្នូ ចុងឆ្នាំនេះ ហើយប្រទេសកាតាក៏បានក្លាយជាម្ចាស់ផ្ទះ World Cup ដំបូងគេបង្អស់នៅមជ្ឈិមបូព៌ា៕
