នៅពេលមុននេះបន្តិច សារព័ត៌មានត្រយងទទួលបានដំណឹងមកថា អតីតតារាសម្ដែងជើងចាស់ រិទ្ធ សារី កំពុងតែធ្លាក់ខ្លួនឈឺធ្ងន់ទ្រុឌទ្រោមខ្លាំង ដេកនៅលើមួយកន្លែងមិនអាចក្រោកបាន ដែលមានការព្រួយបារម្ភខ្លាំង និងគ្មានលទ្ធភាពទិញថ្នាំព្យាបាលជំងឺទៀតទេ។ លោកបានអំពាវនាវសុំជំនួយពីសប្បុរសជនជិតឆ្ងាយ ដើម្បីអាចបន្តទិញថ្នាំព្យាបាលជំងឺរបស់ខ្លួន។
តាមរយៈវីដេអូដែលបានបង្ហោះនៅលើហ្វេសប៊ុកមានឈ្មោះ Chea Samneang គេបានឃើញលោកតា រិទ្ធ សារី ពោលពាក្យអង្វរករទៅកាន់ សម្ដេចតេជោ ហ៊ុន សែន និងបងប្អូនសប្បុរសជនទាំងឡាយថា នៅពេលនេះលោកធ្លាក់ខ្លួនឈឺដុនដាបទៀតហើយដែលមិនអាចក្រោកបាន ។ លោកមានជំងឺជាប់សរសៃចង្កេះ និងជាប់សរសៃពោះ រហូតបណ្ដាលឱ្យមានអាការហើមពោះធ្ងន់ធ្ងរ។
លោកតា រិទ្ធ សារី បានអំពាវសុំជំនួយក្នុងការព្យាបាលជំងឺ ព្រោះលោកអស់លិទ្ធភាពក្នុងការព្យាបាលខ្លួនហើយ ដោយលោកកំពុងសម្រាកព្យាបាលនៅមន្ទីរពេទ្យ កែវ ស៊ីនួន ខេត្តបាត់ដំបង។
គេនៅចាំបានថា លោក រិទ្ធិ សារី គឺជាតារាសម្ដែងជើងចាស់មួយរូប ដែលបានប្រឡូកក្នុងវិស័យសិល្បៈភាពយន្តតាំងពីឆ្នាំ១៩៩០ ដោយថតឱ្យផលិតកម្មព្រហ្មមានជ័យ នៅរាជធានីភ្នំពេញ។ លោក សារី បានសម្រេចចិត្តចាកចេញពីវិស័យភាពយន្ត ទៅរស់នៅជុំប្រពន្ធកូននៅក្នុងខេត្តបាត់ដំបង ក្នុងអាយុ៦១ឆ្នាំ បន្ទាប់ពីវិស័យភាពយន្តជួបវិបត្តិ ហើយត្រូវបិទជាបន្តបន្ទាប់ នៅឆ្នាំ២០០២។ លោកបានប្រើជីវិតរស់នៅខេត្តបាត់ដំបង ហើយយូរៗម្ដង ទើបមានផលិតកម្មអញ្ជើញលោកឱ្យមកសម្ដែងក្នុងភាពយន្ត និងចម្រៀងខារ៉ាអូខេ៕
ប្រភព៖ Chea Samneang