ក្រុមបាល់ទះជម្រើសជាតិក្នុងសាលបុរសរបស់កម្ពុជា ក្លាយជាម្ចាស់មេដាយសំរឹទ្ធិជាលើកដំបូងក្នុងប្រវត្តិសាស្ត្រនៃព្រឹត្តិការណ៍កីឡាស៊ីហ្គេម ក្រោយយកឈ្នះលើក្រុមជម្រើសជាតិថៃ ដោយលទ្ធផល៣សិតទល់២សិត ក្នុងវគ្គដណ្តើមចំណាត់ថ្នាក់លេខ៣ នៅរសៀលថ្ងៃសៅរ៍ ទី២១ ខែឧសភា ឆ្នាំ២០២២ នេះ ឯប្រទេសវៀតណាម។
ក្រោយឈ្នះមេដាយសំរឹទ្ធិក្នុងព្រឹត្តិការណ៍កីឡាស៊ីហ្គេមលើកទី៣១ នេះឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានសហព័ន្ធកីឡាបាល់ទះកម្ពុជា បានផ្ញើសារភ្លាមៗនៅលើបណ្តាញសង្គមហ្វេសប៊ុកផ្ទាល់របស់ឯកឧត្តម ដល់ក្រុមកីឡាករ គ្រូបង្វឹក និងប្រតិភូ ដឹកនាំក្រុមថា៖«ក្នុងនាមប្រធានសហព័ន្ធកីឡាបាល់ទះកម្ពុជា ខ្ញុំសូមកោតសរសើរ ដោយស្មោះចំពោះសមទ្ធផលថ្មីជាប្រវត្តិសាស្ត្រ របស់ ក្រុមកីឡាករបាល់ទះកម្ពុជាយើង ដែលទទួលបានមេដាយសំរឹទ្ធិ ក្នុងការប្រកួត Sea Game លើកទី៣១ បន្ទាប់ពីបានយកឈ្នះក្រុមបាល់ទះជម្រើសជាតិថៃ ៣-២ សិត។
ក្បាលម៉ាស៊ីនសហព័ន្ធបានបន្ថែមថា៖«នេះគឺជាមោទនភាពជាតិដ៏ធំធេង ក្នុងវិស័យកីឡាបាល់ទះរបស់យើង ដែលបានមកពីការខិតខំប្រឹងប្រែងរបស់កីឡាកម្ពុជាយើងដែលខ្ញុំសូមឆ្លៀតឱកាសនេះ ចូលរួមអបអរសាទរចំពោះ កីឡាករទាំងអស់ រួមទាំងគ្រូបង្វឹក អជ្ញារកណ្តាល ជំនួយការ និង ប្រតិភូកីឡាករបាល់ទះកម្ពុជាយើងទាំងអស់ ចំពោះជោគជ័យដ៏ត្រចះត្រចង់នេះ។ សូមជូនពរក្រុមកីឡាករ និង ប្រតិភូរបស់យើង ដំណើរមាតុភូមិនិវត្តន៍ប្រកបដោយសុវត្ថិភាព និង មានសុខភាពល្អបរិបូរណ៍ និង សូមខិតខំ ហ្វឹកហាត់បន្តទៀត ដើម្បីឈានទៅដណ្តើមមេដាយមាស នៅ Sea Game លើកទី៣២ ដែលកម្ពុជានឹងធ្វើជាម្ចាស់ផ្ទះនាឆ្នាំក្រោយនេះ»។
អត្ថបទពាក់ព័ន្ធ៖ឯកឧត្តម នេត សាវឿន បន្តជាប្រធានសហព័ន្ធកីឡាបាល់ទះកម្ពុជាអាណត្តិ២០២២-២០២៦
សូមបញ្ជាក់ថាក្រុមបាល់ទះបុរសក្នុងសាលរបស់កម្ពុជា បានចូលរួមប្រកួតក្នុងព្រឹត្តិការការណ៍កីឡាស៊ីហ្គេមលើកទី៣១ នៅប្រទេសវៀតណាម ស្ថិតក្នុងពូល B ដោយបានយកឈ្នះក្រុមហ្វីលីពីន ៣សិតទល់១សិត ហើយបន្តចាញ់ថៃ ៣សិតទល់២សិត ក្នុងវគ្គសន្សំពិន្ទុតាមពូល។ ចូលដល់វគ្គពាក់កណ្ដាលផ្ដាច់ព្រ័ត្រក្រុមកម្ពុជា បានចាញ់ម្ចាស់មេដាយមាស១០សម័យកាលឥណ្ឌូណេស៊ី ដោយលទ្ធផល ៣សិតទល់១សិត ហើយបានយកឈ្នះថៃ នៅវគ្គដណ្តើមចំណាត់ថ្នាក់លេខ៣ ដោយលទ្ធផល៣សិតទល់២សិត នេះតែម្តង៕
