ព្រោះពាក្យថា «ដេករង់ចាំទឹកភ្លៀង» បានធ្វើឱ្យបងប្អូនប្រុសបង្កើតមានគ្នាចំនួន ៣នាក់ ឈរជើងយ៉ាងរឹងមាំលើវិថីសិល្បៈអស់រយៈពេល១០ឆ្នាំ និងបានបង្កើតក្រុមតន្ត្រីមួយដែលឱ្យឈ្មោះថា SUFFER ដែលសព្វថ្ងៃ ក្រុមតន្ត្រី SUFFER ត្រូវបានគាំទ្រយ៉ាងខ្លាំងដោយផលិតកម្មរណ្ដំ។
ដើម្បីជាចំណងដៃដល់អ្នកគាំទ្រ ផលិតកម្មរណ្ដំ បានរៀបចំការចាក់ផ្សាយវីដេអូឯកសារចំណងជើងថា៖ «ជីវិត៣តន្ត្រីតែមួយ» រៀបរាប់អំពីខ្សែជិវិតបងប្អូនប្រុសចំនួនបីនាក់នៃក្រុមតន្រ្តីផប់រ៉ក SUFFER ។ ការចាក់ផ្សាយជាផ្លូវការនេះ មានការចូលរួមពីក្រុមគ្រួសារ សិល្បៈករផ្សេងៗ រួមទាំងអ្នកគាំទ្រ (ហ្វេនៗ) នាល្ងាចថ្ងៃសៅរ៍ទី២១ ខែឧសភា ។
ទន្ទឹមនឹងនេះដែរ «រណ្តំ – RONDOM» និង ក្រុមតន្រ្តី SUFFER ក៏បានប្រកាសចេញផ្សាយអាល់ប៊ុមថ្មីចំណងជើងថា៖ «Three Brothers» បង្ហាញពីក្ដីស្រម៉ៃ និងភាពអត់ធ្មត់ ដែលប្រិយមិត្តនិងអ្នកគាំទ្រក្រុម SUFFER ទាំងអស់អាចស្ដាប់បទចម្រៀងទាំងអស់នេះនៅលើ Pleng បានផងដែរ។ ក្នុងអាល់ប៊ុមនេះដែរ មានចម្រៀងចំនួន៧បទ បែបផប់រ៉ក (pop rock) បង្ហាញពីភាពតស៊ូ អត់ធ្មត់ និងក្ដីស្រម៉ៃនានាក្នុងនាមជាបងប្អូនប្រុសបីនាក់ដែលចូលចិត្តស្រលាញ់តន្រ្តីដូចគ្នានិងបានធ្វើការរួមគ្នាលើវិថីតន្រ្តីជាលក្ខណៈក្រុមអស់រយៈពេលជាង១០ឆ្នាំកន្លងមក ទោះបីជាមានឧបសគ្គ និងកត្តារាំងស្ទះយ៉ាងណាក្ដី។
នៅថ្ងៃដដែលនេះដែរ ផលិតកកម្ម «រណ្តំ – RONDOM» និងក្រុមតន្រ្តី SUFFER ប្រកាសថ្ងៃប្រគុំតន្រ្តីសម្ដែងដោយបងប្អូនប្រុសទាំងបី នៅថ្ងៃទី១២ ខែមិថុនាខាងមុខនេះ។ ប្រិយមិត្តនិងអ្នកគាំទ្រ (ហ្វេនៗ) ក្រុមតន្រ្តី SUFFER ទាំងអស់អាចរកទិញ សំបុត្រទស្សនាការប្រគុំតន្រ្តីនៅលើគេទំព័រហ្វេសប៊ុករបស់ទំព័រហ្វេសប៊ុករបស់រណ្តំ – RONDOM និងក្រុម SUFFER ផងដែរ។
មានឪពុកជាសិល្បៈករលេងឧបករណ៍តន្រ្តីសម័យទំនើបលោកសុខ សារិន (ទទួលអនិច្ចកម្ម) និងអ្នកម្ដាយរុន សារ៉េតជាសិល្បៈករចម្រៀង សមាជិកក្រុមតន្រ្តី SUFFER រួមមាន លោកសុខ សារ៉ាដាំ ជាអ្នកលេងហ្គីតាបាស់ លោកសុខ សារ៉ាដា ជាដៃស្គរ និងលោកសុខ សារ៉ាដែនជាអ្នកចម្រៀង និងអ្នកលេងហ្គីតាផងដែរ។តាំងចិត្តចែករំលែកបទពិសោធន៍ជិវិត និងការអត់ធ្មត់ក្នុងនាមជាសិល្បៈករ និងពួកគេ។
បន្ទាប់នេះ សូមរីករាយទស្សនាវីដេអូឯកសារ «ជីវិត៣តន្ត្រីតែមួយ»៖