រហូតមកទល់ថ្ងៃទី ២៣ ខែឧសភា ឆ្នាំ២០២២នេះ គេកត់សម្គាល់ឃើញមាន តារាសិល្បៈ ៤ ដួង ដែលបានប្រកាសនៅលើហ្វេសប៊ុករបស់ខ្លួនថា សាមីខ្លួនត្រូវជនខិលខូចយករូបភាពរបស់ខ្លួន ទៅបង្កើត Fake Account ឬគណនីក្លែងក្លាយ ដើម្បីធ្វើសកម្មភាពបោកប្រាស់យកលុយ និងចាប់រង្វាន់ធំដើមយកលុយ ដែលសកម្មភាពទាំងនេះនាំឱ្យខូចកិត្តិយស កេរ្ដិ៍ឈ្មោះសិល្បៈនិងសេចក្ដីថ្លៃថ្នូរខ្លួន។
ហេតុការណ៍នេះ កន្លងមកគេតែឃើញមានកើតមានលើតារាសិល្បៈខ្មែរជារឿយៗ រហូតធ្វើឱ្យពួកគេទ្រាំលែងបាន និងទាមទារឱ្យមហាជនស្គាល់គណនីហ្វេសប៊ុក ឬគណនីលើបណ្ដាញសង្គមនានា ជាផ្លូវការរបស់ពួកគេឱ្យច្បាស់ និងបង្កើនការប្រុងប្រយ័ត្ន។ ដោយឡែកថ្មីនេះគេឃើញមានតារាសម្ដែង ៣ ដួង ដូចជា ព្រីន ទ្រីដារ៉ាវុធ និងកញ្ញា មាន សូនីតា ដែលកំពុងតែរងគ្រោះក្រោមថ្វីដៃជនខិលខូច។ ហើយមានតារាសម្ដែងប្រុសមួយទៀត ក៏ធ្លាប់ជួបបញ្ហានេះ គឺលោក យក់ ឆេងហាក់។
ព្រីន 
ទ្រីដារ៉ាវុធ 
មាន សូនីតា
ជាមួយគ្នានោះដែរ នៅថ្ងៃទី ១៦ ខែឧសភា តារាសម្ដែង ព្រីន ដែលមានមុខមាត់សង្ហា ត្រូវបានជនខិលខូច យករូបភាពពីហ្វេសប៊ុករបស់លោកទៅបង្កើតគណនីក្លែងក្លាយមួយឈ្មោះ បងសិនលក់ម៉ូតូគ្រប់ប្រភេទ ។ គណនីនេះបានធ្វើសកម្មភាពបោកនារីរងគ្រោះជាច្រើននាក់ សរុបជាទឹកប្រាក់ជិតចូលខ្ទង់ម៉ឺនដុល្លារ ព្រមទាំងបានបោកយកម៉ូតូជាច្រើនគ្រឿងទៀត។ នារីរងគ្រោះមួយរូបបានភ្ញាក់ខ្លួននិងដឹងថាខ្លួនត្រូវបានគេបោកប្រាស់ ដោយសារតែពេលកំពុងតែជជែកជាមួយនឹងព្រីនក្លែងក្លាយនោះ ស្រាប់តែកញ្ញាបានឃើញព្រីនកំពុងតែ Live ជាមួយនឹងអ្នកស្រី ទ្រី ដាណា ក្នុងកម្មវិធីបើកសម្ពោធហាងថ្មី ទើបធ្វើឱ្យខ្លួនដឹងថាត្រូវគេបោក ហើយមិនបានផ្ញើប្រាក់ចំនួន២ពាន់ដុល្លារទៅឱ្យថែមទៀត។
រហូតដល់ថ្ងៃទី ១៩ ខែឧសភា ឆ្នាំ ២០២២ គេស្រាប់តែតារាសម្ដែង ទ្រី ដារ៉ាវុធ ជាតារាប្រុសម្នាក់ទៀត ដែលចេញមុខ Live នៅលើបណ្ដាញសង្គមហ្វេសប៊ុកឱ្យមហាជនបានដឹងថា លោកក៏ត្រូវបានជនខិលខូចយករូបភាពរបស់លោក ទៅបង្កើតជាគណនីហ្វេសប៊ុកក្លែងក្លាយផ្សេងៗជាច្រើនគណនី ហើយធ្វើសម្មភាពដើរបោកលុយ។ ក៏មិនខុសគ្នាអីពីលោក ព្រីន ឡើយ ជនខិលខូចបានបន្លំភ្នែកអ្នកគាំទ្ររបស់ ទ្រី ដារ៉ាវុធ និងបង្កើតមនោសញ្ចេតនាក្លែងក្លាយ ហើយបោកឱ្យផ្ញើលុយមកឱ្យខ្លួន។ លុះដល់ពេលបែករឿង និងភ្ញាក់ខ្លួនថា ត្រូវចាញ់បោក ជនរងគ្រោះបានឆាតមកលោក ទ្រី ដារ៉ាវុធ ដើម្បីទាមទាររកដំណោះស្រាយ និងមានខ្លះទៀត ទៅរករឿងដល់គ្រួសាររបស់លោកថែមទៀត។ តារាសម្ដែងប្រុសរូបនេះ បានបកស្រាយ និងអំពាវនាវឱ្យមហាជនស្រឡាញ់គាំទ្រលោក ឱ្យឈប់ល្ងិតល្ងង់ចាញ់បោកគេទៀតទៅ លោកហត់នឹងនិយាយដដែលៗ ព្រោះថាឆ្នាំ ២០២២ ហើយ លោកចង់មហាជនប្រើភាពឆ្លាតវ័យឱ្យបានច្រើន ប្រើសតិបញ្ញាមករស់នៅក្នុងសង្គមបច្ចេកវិទ្យានេះ និងស្វែងយល់មួយណាជាគណនីពិតរបស់លោក។
ហើយមកដល់ថ្ងៃទី ២២ ខែ ឧសភា នេះទៀត គេក៏ស្រាប់តែឃើញតារាសម្ដែងស្រី មាន សូនីតា ក៏ចេញមកបង្ហោះឱ្យមហាជនប្រុងប្រយ័ត្នចំពោះគណនីហ្វេសប៊ុកឈ្មោះ M͙e͙a͙n͙ ͙S͙o͙n͙y͙t͙a͙ ដែលកំពុងធ្វើសកម្មភាពបោកប្រាស់ ទាយលេខយករង្វាន់។ តារាស្រីរូបនេះបានរៀបរាប់ថា ហ្វេសប៊ុកផេកមួយនេះ មិនមែនជាផេករបស់កញ្ញានោះទេ រីឯហ្វេសប៊ុកផេកផ្លូវការរបស់កញ្ញាគឺមានសញ្ញាគ្រីសពណ៌ខៀវ ឬគេហៅថា verify ជាទទួលស្គាល់ពីក្រុមហ៊ុនហ្វេសបុកតែ១នេះ គត់ ហើយកញ្ញាក៏មិនមានការចែករង្វាន់ ឬមានលេងហ្គេមចែកជាទឹកប្រាក់អីនោះទេ។ ដូច្នេះបើសិនជាមានការឆបោកពីជនខិលខូចដោយប្រការណាមួយ កញ្ញាថាខ្លួនមិនទទួលខុសត្រូវឡើយ ហើយសុំឱ្យមហាជនប្រុងប្រយ័ត្នឱ្យបានខ្ពស់។
ក្រៅពីតារា៣ដួងខាងលើនេះហើយ គេនៅចាំបានថា តារាសម្ដែងប្រុស យក់ ឆេងហាក់ ក៏ធ្លាប់ជួបហេតុការណ៍នេះដែរ ដោយគណនីដែលបានយករូបលោកទៅប្រើប្រាស់នោះបានដាក់ឈ្មោះថា វណ្ណា រ៉ុងរ័ត្ន (Vanna Rong Rath) ហើយគណនីនោះបានយកទៅទាក់ទងជាមួយនារីម្នាក់និងបានបោកលុយនាង រហូតធ្វើឱ្យនាងយល់ច្រឡំ ហើយចោទប្រកាន់លើរូបលោក ថែមទាំងផុសបរិហាកេរ្តិ៍លោកលើបណ្ដាញសង្គម ដែលធ្វើឱ្យប៉ះពាល់ដល់កិត្តិយសរបស់លោកជាខ្លាំង។
សូមជម្រាបថា មហាជនអ្នកគាំទ្រគ្រប់រូបគួរតែបង្កើនការប្រុងប្រយ័ត្នខ្លួនឱ្យបានច្រើន និងស្វែងពីគណនីពិតរបស់អាយដលខ្លួន ដើម្បីចៀសវៀងការឆបោកណាមួយ និងកុំឱ្យខ្លួនក្លាយជាជនរងគ្រោះតទៅទៀត៕
អត្ថបទពាក់ព័ន្ធ៖
ទ្រី ដារ៉ាវុធ ៖ «កុំចាញ់បោកគេហើយយកគ្រួសារខ្ញុំជាចំណាត់ខ្មាំង»
យក់ ឆេងហាក់ តារាវ័យក្មេងត្រូវជនអនាមិកប្រើរូបបោកប្រាស់លុយស្រីរាប់ពាន់ដុល្លារ!
