ឥណ្ឌា – តារាសម្ដែងឥណ្ឌាវ័យ២១ឆ្នាំ មិនស្ដាប់តាមអ្នកផ្ទះ បានលួចទៅបូមខ្លាញ់ ដោយមិនឱ្យអ្នកផ្ទះដឹង ព្រោះអ្នកផ្ទះហាមនិងដាស់តឿនថានាងមានរូបរាងស្អាតស្រាប់ហើយកុំបាច់បូមខ្លាញ់អី ទីបំផុតបានស្លាប់ហើយ។
យោងតាមសារព័ត៌មាន Stratetimes បានផ្សព្វផ្សាយថាតារាសម្ដែងវ័យ២១ឆ្នាំ ជាតារាសម្ដែងភាពយន្តមានដើមកំណើតនៅរដ្ឋ ណាតាកា ស្ថិតនៅតំបន់និរតីនៃប្រទេសឥណ្ឌា បានស្លាប់បាត់បង់ជីវិតហើយ ក្រោយនាងបានទៅកែសម្ផស្សបន្ថែមសម្រស់ដោយការបូមយកខ្លាញ់ចេញ។
លោកយាយរបស់ Chethana Raj បានប្រាប់សារព័ត៌មានក្នុងស្រុកថា ចៅស្រីរបស់លោកយាយបានមកសុំប្រាក់លោកយាយចំនួន ១៥០០០០រូពី (1,932$) ដើម្បីទៅវះកាត់បូមយកខ្លាញ់ចេញ ប៉ុន្តែគ្រួសារបដិសេធ ព្រមទាំងហាមឃាត់នាងមិនឱ្យធ្វើ ដោយបានប្រាប់ថានាងមានរូបស្អាតសមសួនហើយ មិនធាត់នោះទេ។
ប៉ុន្តែ Chethana មិនស្ដាប់តាមអ្នកផ្ទះ នាងបានប្រមូលលុយផ្ទាល់ខ្លួន ហើយធ្វើដំណើរទៅកាន់គ្លីនីកកែសម្ផស្ស Dr.Shetty’s Cosmetic Centre ដោយមិនបានប្រាប់ឪពុកម្ដាយនោះឡើយ។ ខណៈកំពុងតែវះកាត់ស្រាប់តែមានបញ្ហាបណ្ដាលឱ្យដកដង្ហើមមិនចេញ ព្រោះមានទឹកនៅក្នុងសួត មុននឹងត្រូវបញ្ជូនទៅមន្ទីរពេទ្យ។
ទៅដល់មន្ទីរពេទ្យ វេជ្ជបណ្ឌិតបានពិនិត្យឃើញថា តារាស្រីវ័យនេះគាំងបេះដូង បាត់បង់ស្មារតី និងបាត់ជីពចរ ទោះជាគ្រូពេទ្យប្រឹងជួយដោយការធ្វើ CPR ព្រមទាំងព្យាយាមសង្គ្រោះជីវិតនាងប្រមាណ៤៥នាទី ប៉ុន្តែទីបំផុតគ្រូពេទ្យនៅតែមិនអាចសង្គ្រោះជីវិតរបស់នាងបាន។
ក្រុមគ្រួសារតារាស្រីរូបនេះបានចូលទៅដាក់ពាក្យបណ្ដឹងនៅប៉ុស្ដិ៍ប៉ូលិសដើម្បីប្ដឹងគ្លីនីកកែសម្ផស្សខាងលើដោយចោទប្រកាន់ថា «ជាកំហុសបច្ចេកទេសរបស់គ្លីនីកទើបបណ្ដាលឱ្យមានអ្នកបាត់បង់ជីវិត។ លោកពុករបស់តារាឥណ្ឌារូបនេះបានពោលថា៖ «កូនស្រីពួកខ្ញុំបាត់បង់ជីវិតដោយសារតែការប្រមាទរបស់គ្លីនិក កូនស្រីខ្ញុំជាមនុស្សរឹងមាំនិងរួសរាយ នាងសុខភាពល្អណាស់»៕
ប្រភព៖ TV9 Gujarati
