កូរ៉េខាងត្បូង – តារាសម្ដែងវ័យក្មេងនៅក្នុងរឿង «Autumn in My Heart» នាង Lee Ae Jeong គឺជានារីម្នាក់ស្អាត មានសមត្ថភាពនិងទេពកោសល្យល្អ ប៉ុន្តែគួរឱ្យស្ដាយនាងបែរជាស្លាប់ទាំងវ័យក្មេងទៅវិញ។
ថ្វីត្បិតតែនាងបានលាចាកលោកនេះទៅយូរហើយក្ដី ប៉ុន្តែអ្នកទស្សនាមួយភាគធំ ពិសេសអ្នកដែលទស្សនារឿងភាគកូរ៉េ «Autumn in My Heart» នៅតែនឹកស្រណោះដល់តារាសម្ដែងវ័យក្មេងដែលអាយុខ្លីរូបនេះជាពន់ពេក។
បើនិយាយដល់ «និទានស្នេហ៍និទាឃរដូវ» សម្រាប់តួសម្ដែងស្រីកាលពីវ័យក្មេងអ្នកទស្សនាភាគច្រើនប្រាកដជានឹកទៅដល់ Moon Geun Young ដែលសម្ដែងជាតួអង្គ Song Hye Kyo កាលពីនៅក្មេង ប៉ុន្តែបើនិយាយដល់តួអង្គក្មេង ក្រៅពី Moon Geun Young នៅមានតារាស្រីម្នាក់ទៀតដែលស្អាតនិងគួរឱ្យចាប់អារម្មណ៍មិនចាញ់គ្នាគឺ Lee Ae Jeong តែគួរឱ្យស្ដាយដែលនាងមិនមានសំណាងដូចមិត្តរួមអាជីពរបស់ខ្លួន
នៅក្នុងរឿង «Autumn in My Heart» Lee Ae Jeong សម្ដែងជាតួអង្គ Choi Shin Ae ជាក្មេងស្រីម្នាក់ស្អាត ពូកែសម្ដែងរហូតទទួលបានពាក្យសរសើរច្រើន។ ក្រោយពីសម្ដែងរឿងភាគនេះនាងរួចបានសម្ដែងរឿងភាគច្រើនទៀតនិងបានសម្ដែងតួជាច្រើនប្រភេទខុសគ្នា ប៉ុន្តែក្រោយមកជីវិតរបស់នាងស្រាប់តែជួបគ្រោះអាក្រក់។
ត្រលប់ទៅឆ្នាំ២០០៦ នៅអាយុជាង១៩ឆ្នាំ ខណៈដែលអនាគតកំពុងតែលេចធ្លោនិងបញ្ចាំងពន្លឺត្រចះត្រចង់ ខណៈដែលនាងទើបប្រឡងជាប់ចូលមហាវិទ្យាល័យ Hanyang University ស្រាប់តែ Lee Ae Jeong ធ្លាក់ខ្លួនឈឺដោយសារជំងឺមហារីក។ កាលណោះនាងឧស្សាហ៍ឈឺក្បាលប៉ុន្តែនាងគិតថាធម្មតាដូច្នេះនាងគ្រាន់តែផឹកថ្នាំ ក្រោយមកនាងបានទៅពេទ្យ ពិនិត្យឃើញថានាងសល់ពេលមិនច្រើនទៀតនោះទេ។ នាងបានវះកាត់២ដងនៅមន្ទីរពេទ្យសកលវិទ្យាល័យជាតិ Seoul តែមិនអាចយកឈ្នះជំងឺមហារីកនោះទេ។
ដង្ហើមចុងក្រោយរបស់នាងបានផុតរលត់ពីផែនដីនេះនៅថ្ងៃទី៩ ខែកញ្ញាឆ្នាំ ២០០៧ នៅក្នងុមន្ទីរពេទ្យខេត្តនាស្រុកកំណើតនៅ Gyeonggi សាធារណរដ្ឋកូរ៉េ៕
ប្រភព៖ lovekpop95