កូនកាត់ខ្មែរ-អាមេរិក Davy Armstrong គឺជាកីឡាករបាល់ទាត់ដំបូងគេដែលធ្លាប់លេងនៅលីគកំពូលរបស់សហរដ្ឋអាមេរិក Major League Soccer ក្នុងក្រុម Colorado Rapids បច្ចុប្បន្នប្រកបអាជីពជាអ្នកពន្លត់អគ្គីភ័យ នៅរដ្ឋ Colorado ដោយសារបញ្ហារបួសដាច់សរសៃជង្គង់ ACL។
Davy Armstrong បានកើតនៅរដ្ឋ Colorado មានកម្ពស់១.៨០ម៉ែត្រ លេងតំណែងជាខ្សែបម្រើការពារ ដោយមានឪពុកជាជនជាតិខ្មែរ ហើយបានចាប់ផ្តើមចូលលេងបាល់ទាត់ដំបូងនៅថ្នាលយុវជនរបស់ក្លិប Colorado Rapids ចាប់ពីឆ្នាំ២០០៧-២០១០។
លុះដល់ឆ្នាំ ២០១០ Davy Armstrong បានក្លាយជាកីឡាករខ្មែរដំបូងគេដែលបានអភិវឌ្ឍខ្លួនចូលទៅលេងក្នុងឈុតធំ របស់ក្រុម Colorado Rapids នៃក្របខណ្ឌកំពូល Major League Soccer របស់អាមេរិក។ ព្រមទាំងជួយឲ្យក្រុមឈ្នះពានរង្វាន់ Eastern Conference Championship និង MLS Cup ជាដើម។
នៅដើមឆ្នាំ ២០១១ Davy Armstrong ក៏ធ្លាប់ត្រូវបានសហព័ន្ធកីឡាបាល់ទាត់កម្ពុជា កំណត់ថាជាកីឡាករខ្មែរ ដែលអាចចូលរួមក្រុមជម្រើសជាតិកម្ពុជា ព្រោះគាត់មានលក្ខណៈសម្បត្តិគ្រប់គ្រាន់ ជាពិសេសមានឪពុកជាជនជាតិខ្មែរស្រាប់។ ប៉ុន្តែគ្រប់យ៉ាងត្រូវបានប្តូរផ្លាស់ដោយសារ Davy រងរបួសដាច់សរសៃជង្គង់ ACL៕