ភ្នំពេញ៖ នាយកដ្ឋានគ្រប់គ្រងសន្តិសុខឯកជន បានបង្ហោះឲ្យដឹងនៅថ្ងៃទី២៤ខែឧសភាឆ្នាំ២០២២នេះថា តុលាការបានសម្រេចឃុំខ្លួនជនត្រូវចោទ៣នាក់ ដាក់ពន្ធនាគារព្រៃស ម១ ជាបណ្ដោះអាសន្នពីបទ លួចមានស្ថានទម្ងន់ទោស បទ ទទួលផលចោរកម្ម។
ប្រភពដដែលបានឲ្យដឹងថា កាលពីថ្ងៃទី១២ ខែឧសភា ឆ្នាំ២០២២ វេលាម៉ោង០២:៣៩នាទី មានករណីគាស់រោងចក្រ Wing Star Shoes Co.Ltd ស្ថិតនៅភូមិភោគ ឃុំវិហារ ស្រុកគងពិសី ខេត្តកំពង់ស្ពឺ ជនសង្ស័យចំនួន០៤នាក់ បានចូលគាស់បង្អូចឃ្លាំងរោងចក្រខាងលើ លួចយកស្បែកជើងម៉ាក Asics ចំនួន៣៣កេះ ស្មើនិង៣៩៤គូរ និងប្រាក់ចំនួន ៤០០.០០០រៀល រួចគេចខ្លួន ។
ក្រោយពីទទួលពាក្យបណ្តឹងពី ក្រុមហ៊ុនសន្តិសុខឯកជន ហ្វ័រត្រាស និងជាតំណាង រោងចក្រខាងលើ នៅថ្ងៃទី១៧ ខែឧសភា ឆ្នាំ២០២២ ដោយមានការចង្អុលបង្ហាញពី ឯកឧត្តម ឧត្តមសេនីយ៍ឯក អ៊ី សុខឃី អគ្គស្នងការរងនគរបាលជាតិ ឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្តិសុខឯកជន បានចាត់កម្លាំងស៊ើបអង្កេត ដឹកនាំ លោក វរសេនីយ៍ឯក ស៊ិន សុផល នាយការិយាល័យស៊ើបអង្កេត និងអនុវត្តនីតិវិធី និងបានស្នើសុំការអនុញ្ញាតពី ឯកឧត្តម ច្រឹង ខ្មៅ ព្រះរាជអាជ្ញា អមសាលាដំបូងរាជធានីភ្នំពេញ និងស្នងការដ្ឋាននគរបាលរាជធានីភ្នំពេញ ចុះឆែកឆេរលំនៅដ្ឋានលេខ១១០ ផ្លូវបេតុង សង្កាត់ពងទឹក ខណ្ឌដង្កោ បានរកឃើញស្បែកជើងម៉ាក Asics ដែលមានលេខកូដដូចស្បែកជើងដែលបានបាត់ចំនួន ១៤៩គូ និងឈានដល់ការឃាត់ខ្លួនជនសង្ស័យចំនួន ០៣នាក់ បញ្ជូនទៅសាលាដំបូងរាជធានីភ្នំពេញ។
ជនសង្ស័យទាំង៣នាក់រួមមាន៖
១.ឈ្មោះ ប៉ាក លី ហៅចាន់ ភេទប្រុស អាយុ៣៨ឆ្នាំ មុខរបរ កម្មករសំណង់
២.ឈ្មោះ លេង វិចិត្រ ភេទប្រុស អាយុ៣៣ឆ្នាំ កម្មករសំណង់ (ធ្លាប់ជាប់ពន្ធនាគារ)
៣.ឈ្មោះ ផា ចាន់រិទ្ធ ហៅការ៉ូ ភេទប្រុស អាយុ៤១ឆ្នាំ មុខរបរ រត់តាក់ស៊ី (អ្នកទទួលផលចោរកម្ម)
ចំណែកឯបក្ខពួក០២នាក់ទៀតរត់គេចខ្លួន៖ ឈ្មោះ សឿន ហៅ អាខ្មៅ ជាមេក្លោង និងឈ្មោះ រ័ត្ន ភេទប្រុស អាយុ៣០ឆ្នាំ កំពុងបន្តស្វែងរកចាប់ខ្លួន ដើម្បីបញ្ជូនទៅតុលាការផ្តន្ទាទោសតាមច្បាប់ ៕
អត្ថបទ៖ចតុមុខ