កន្លងមកនេះ មហាជនទាំងអស់គ្នាបានដឹងមកថា អ្នកអង្គម្ចាស់ នរោត្តម រស្មី ខែមុន្នី ត្រូវបានជ្រើសរើសជាតួសម្ដែងក្នុងខ្សែភាពយន្តហូលីវូដថ្មីមួយដែលមានចំណងជើងថា «1660 Vine» ហើយភាពយន្តនេះ គ្រោងនឹងផ្ដើមថតនៅដើមខែ មិថុន នៅរដ្ឋ LA សហរដ្ឋអាមេរិក។ នេះក៏ជាភាពយន្តដំបូងរបស់អ្នកអង្គម្ចាស់ នរោត្តម រស្មី ខែមុន្នី សម្ដែងជាតួឯកប្រុសតែម្ដង។
ដោយឡែកថ្មីៗនេះ សារព័ត៌មានត្រយង បានទទួលដំណឹងអាប់ដេតជាបន្តទៀតថា ខ្សែភាពយន្តហូលីវូដដែលអ្នកអង្គម្ចាស់ នរោត្តម រស្មី ខែមុន្នី បានចូលរួមសម្ដែងនេះ គឺគ្រោងបញ្ចាំងជាផ្លូវការនៅឆ្នាំ២០២៤ ហើយមហាជនអ្នកគាំទ្រទាំងអស់អាចចូលរួមទស្សនាបានតាមរយៈគេហទំព័រចំនួន ២គឺ StreamingMusicals.com និង BroadwayOnDemand.com ។ ភាពយន្តនេះ ត្រូវបានគេដឹងថា មានការចូលរួមសម្ដែងពី អ្នកគ្រូបង្វឹក Cheryl Porter ដែលជាគ្រូបង្វឹកសំឡេងច្រៀងនៅលើបណ្ដាញសង្គមនានា ជាពិសេសល្បីខ្លាំងនៅលើ TikTok តារាសម្តែង Chris Olsen និងម្ចាស់ពាន American Idol កញ្ញា Pia Toscano។
ភាពយន្ត «1660 Vine» គឺជាតន្ត្រីភាពយន្តថ្មីមួយ ដែលមានភាពស្រដៀងគ្នាទៅនឹងភាពយន្ត Higt Scool Musical ដែលគោលគំនិតរបស់ Broadway ។ Broadway គឺជារោងមហោស្រពដែលសម្ដែងល្ខោននិយាយមានលាយឡំចម្រៀង នៅម្ដុំទីប្រជុំជន Midtown Manhattan នៃទីក្រុង New York City។ ប៉ុន្តែដោយសារតែវិបត្តិនៃជំងឺកូវីដ ទើបការទស្សនាត្រូវបានដាក់ក្នុងប្រព័ន្ធអនឡាញន៍ជំនួសវិញ។
ភាពយន្ត «1660 Vine» ក៏ត្រូវបានសរសេរដោយ Jackson Prince និងអ្នកនិពន្ធបទចម្រៀង 20 ផ្សេងទៀត ក្រោមការណែនាំពីអ្នកគ្រប់គ្រងផ្នែកតន្ត្រី David Lawrence និង Faye Greenberg ពីភាពយន្ត High School Musical។ ខ្សែភាពយន្តនេះផលិតដោយផលិតកម្ម PhilmCo Media ដឹកនាំសម្ដែងដោយ Jonathan Prince និង Kevin Surace & Michael Jackowitz ពីផលិតកម្ម Witzend Productions ។
សាច់រឿងទាំងមូលបានលាតត្រដាងពីក្រុមយុវវ័យដែលប្រើប្រាស់បណ្ដាញសង្គមជាច្រើននាពេលបច្ចុប្បន្ន គឺរំលេចឱ្យឃើញពីគំនិតច្នៃប្រតិដ្ឋរបស់អ្នកនិពន្ធវ័យក្មេងៗចម្រុះគ្នា បង្កើតឡើងជាស្នាដៃបទចម្រៀងថ្មីៗ។
