រដ្ឋាភិបាលយោធាមីយ៉ាន់ម៉ាបានស្នើឲ្យវិស័យសាធារណៈបញ្ឈប់ការប្រើប្រាស់រូបិយប័ណ្ណដុល្លារ សម្រាប់ការទូទាត់ក្នុងស្រុកដើម្បីកាត់បន្ថយការប្រើប្រាស់រូបិយប័ណ្ណបរទេសនៅក្នុងប្រទេស។
ធនាគារកណ្ដាលនៃប្រទេសមីយ៉ាន់ម៉ាបានផ្ញើសេចក្ដីជូនដំណឹងកាលពីថ្ងៃពុធដល់គ្រប់ក្រសួង រដ្ឋាភិបាលខេត្ត និង ស្ថាប័នក្រុងទាំងអស់ឲ្យប្រើប្រាស់តែរូបិយប័ណ្ណ គីយ៉ាត (Kyat) សម្រាប់ប្រតិបត្តិការក្នុងស្រុក រួមទាំងការទូទាត់របស់របស់ទីភ្នាក់ងាររដ្ឋាភិបាល និង សហគ្រាស។
ទេសាភិបាលរងនៃធនាគារកណ្តាល លោក Win Thaw បាននិយាយក្នុងសេចក្តីប្រកាសមួយចេញកាលពីថ្ងៃពុធថា ៖ «បន្ថែមលើតម្រូវការកំពុងកើនឡើងសម្រាប់រូបិយប័ណ្ណបរទេស អត្រាប្តូរប្រាក់អាចប្រែប្រួល ដោយសារការអនុវត្តនៃការទទួល និងបញ្ចេញប្រាក់បរទេសសម្រាប់ទំនិញ និង សេវាកម្មដែលទិញនៅក្នុងប្រទេស»។
លោក Win Thaw បាននិយាយថា បច្ចុប្បន្ន ស្ថាប័ននានាដូចជា សណ្ឋាគារ ភោជនីយដ្ឋាន ហាង និងសាលារៀនអន្តរជាតិជាដើមកំពុងប្រើប្រាស់ប្រាក់ដុល្លារច្រើនជាងប្រាក់គីយ៉ាត ប៉ុន្តែក៏មានអាជីវកម្ម និង ស្ថាប័នដែលដំណើរការដោយក្រសួងដែរ។
លោកបាននិយាយក្នុងសេចក្តីប្រកាសដែលត្រូវបានបញ្ជូនទៅក្រសួង និងរដ្ឋាភិបាលមូលដ្ឋានថា «រូបិយប័ណ្ណគីយ៉ាត របស់មីយ៉ាន់ម៉ា គួរត្រូវបានប្រើក្នុងការទូទាត់ក្នុងស្រុក ទាំងក្រសួងពាក់ព័ន្ធ រដ្ឋាភិបាលមូលដ្ឋាន និងរដ្ឋ…គួរណែនាំស្ថាប័នរបស់ខ្លួនថាជាការចាំបាច់»។
បទបញ្ជានេះ គឺថ្មីបំផុតចំពោះកិច្ចខិតខំប្រឹងប្រែងរបស់អាជ្ញាធរដើម្បីគ្រប់គ្រងបន្ថែមលើរូបិយប័ណ្ណបរទេសក្នុងប្រទេសដែលគ្រប់គ្រងដោយយោធា។
សូមជម្រាបថា សេដ្ឋកិច្ចរបស់ប្រទេសអាស៊ីអាគ្នេយ៍មួយនេះបានធ្លាក់ក្នុងវិបត្តិចាប់តាំងពីយោធាបានដណ្ដើមកាន់កាប់អំណាចកាលពីឆ្នាំមុន បញ្ឈប់កំណែកទម្រង់សេដ្ឋកិច្ច និង នយោបាយរយៈពេល ១០ឆ្នាំ ព្រមទាំងដាក់សម្ពាធលើអត្រាប្ដូរប្រាក់របស់រូបិយប័ណ្ណ គីយ៉ាត ធៀបនឹងរូបិយប័ណ្ណ ដុល្លារ ដែលជារូបិយប័ណ្ណបរទេស៕
