បន្ទាប់ពីទទួលបានការទុកចិត្តខ្ពស់ពីសំណាក់អ្នកឧកញ៉ា ឡេង ណាវ៉ាត់ត្រា អគ្គនាយកផលិតកម្ម Galaxy Navatra ឱ្យកាន់តំណែងជាទីប្រឹក្សានោះ លោក ខាំ ភូរិ បានបង្ហាញការតាំងចិត្តខ្ពស់ក្នុងការចូលរួមលើកស្ទួយសិល្បៈខ្មែរ ឱ្យមានការទទួលស្គាល់លក្ខណៈអាស៊ាន។
ឆ្លើយប្រាប់សារព័ត៌មានត្រយង ផលិតករ និងជាអ្នកដឹកនាំដ៏ល្បីល្បាញលោក ខាំ ភូរិ បានបញ្ជាក់ថាដោយសារតែអ្នកឧកញ៉ា ឡេង ណាវ៉ាត់ត្រា មើលឃើញលោកជាចាស់ទុំម្នាក់ក្នុងវិស័យសិល្បៈ ហេតុដូច្នេះហើយទើបផ្ដល់ទំនុកចិត្តឱ្យលោកកាន់តួនាទីជាទីប្រឹក្សាផលិតកម្ម។
ជាមួយនឹងការទទួលបានតំណែងថ្មីនេះ លោក ខាំ ភូរិ បានលើកឡើងថាការដែលលោកទទួលយកតំណែងជាទីប្រឹក្សានេះដោយសារតែលោកមើលឃើញថាផលិតកម្ម Galaxy មានឆន្ទៈខ្ពស់ក្នុងការលើកស្ទួយ និងជំរុញវិស័យសិល្បៈចម្រៀងខ្មែរទៅក្រៅប្រទេស។ ជាជំហានដំបូងលោក ខាំ ភូរិ បានលើកឡើងថា លោកអាចជួយលើការងារដឹកនាំរបស់ផលិតកម្ម ការនិពន្ធ និងការងារដឹកនាំ ជាដើម។
បុរសដែលមានបទពិសោធចាស់វស្សាក្នុងពិភពសិល្បៈរូបនេះ បានបញ្ជាក់ថាកត្តាដែលជំរុញឱ្យលោកទទួលយកតួនាទីជាទីប្រឹក្សារបស់ផលិតកម្ម Galaxy ព្រោះថា៖ «ខ្ញុំគ្រាន់តែមានឆន្ទៈរួមជាមួយផលិតកម្មដើម្បីសិល្បៈខ្មែរមានការទទួលស្គាល់ជាលក្ខណៈអាស៊ាន»
លោក ខាំ ភូរិ គឺជាអ្នកចាស់ទុំមួយរូបដែលបានប្រឡូកក្នុងសិល្បៈរាប់សិបឆ្នាំកន្លងមកហើយ លោកមានស្នាដៃដឹកនាំរឿងទាំងរឿងភាគ រឿងខ្លី និងបទចម្រៀងជាច្រើនបទដែលមានការទទួលស្គាល់។ ឧទាហរណ៍ដូចជាស្នាដៃរឿងភាគ «សិសិររដូវក្នុងបេះដូង» មានការគាំទ្រយ៉ាងខ្លាំងពីអ្នកទស្សនា។
បន្ទាប់ពីផលិតកម្ម Galaxy Navatra ប្រកាសសមាសភាពបុគ្គលសំខាន់ចំនួន៣ រូប (លោក សុខ ជំនោរ លោក ខាំ ភូរិ និង កញ្ញា យឹម សុជាតា) ដែលនឹងមកកាន់តួនាទីសំខាន់ៗនោះ មហាជនជាពិសេសអ្នកគាំទ្រផលិតកម្ម Galaxy មានជំនឿថាផលិតកម្មប្រាកដជានឹងមានអ្វីដែលកាន់តែពិសេសប្លែកថ្មីដើម្បីបម្រើអារម្មណ៍របស់អ្នកគាំទ្រជាក់ជាមិនខាន៕