ក្រោយបញ្ចាំងត្រឹមតែ ២សប្ដាហ៍ប៉ុណ្ណោះនៅតំបន់អាមេរិកខាងជើង ភាពយន្ត «Top Gun: Maverick» គឺជាភាពយន្តខ្នាតធំដែលរកបានប្រាក់ចំណូលខ្ពស់ជាងគេបំផុតក្នុងអាជីពសិល្បៈរបស់ Tom Cruise ។
យោងតាមសារព័ត៌មាន Variety ភាពយន្តខ្នាតធំមួយនេះបានបន្តទាក់បេះដូងអ្នកទស្សនារហូតកាន់ពានជាភាពយន្តដែលរកបានចំណូលខ្ពស់បំផុតត្រឹម២សប្ដាហ៍ដំបូងដែលចាក់បញ្ចាំង។ សប្ដាហ៍មុនភាពយន្តនេះរកបានចំណូលបន្ថែមចំនួន៨៦លានដុល្លារទៀតពីរោងភាពយន្តចំនួន៤៧៥១កន្លែងនៅជុំវិញតំបន់អាមេរិកខាងជើង នាំឱ្យចំណូលសរុបកើនឡើងដល់ ២៩១លានដុល្លារ។ ចំណូលសរុបនៃភាពយន្តរដូវកាលទីពីរ Top Gun នេះបានយកឈ្នះភាពយន្ត War of The Worlds (២៤៣លានដុល្លារ) ក្លាយជាភាពយន្តក្នុងស្រុកដែលរកបានចំណូលខ្ពស់បំផុតរបស់ Tom Cruise។
ថ្មីៗនេះភាពយន្តល្បីល្បាញច្រើនរឿងដូចជា Spider Man No Way Home ឬ Doctor Strange in the Multiverse of Madness នៅសប្ដាហ៍ទីពីរអត្រាលក់សំបុត្របានធ្លាក់ចុះរហូតដល់ទៅ ៦៧% ចំណែកឯរឿង The Batman អត្រាលក់សំបុត្រក៏ធ្លាក់ចុះ៥០%ភាគដែរក្នុងសប្ដាហ៍ទីពីរ ខណៈរឿង Top Gun: Maverick របស់ Tom Cruise អត្រាលក់សំបុត្រចូលទស្សនាធ្លាក់ចុះតែត្រឹម៣០ភាគរយប៉ុណ្ណោះ។
សារព័ត៌មានធំៗរបស់អាមេរិកមាន Variety , The Independent និង IndieWire បានចាត់ទុកថារឿងនេះគឺជាស្នាដៃល្អបំផុតរបស់ Tom សម្រាប់ការសម្ដែងរបស់លោករយៈពេលជាង៤០ឆ្នាំមកនេះ។
សម្រាប់ទីផ្សារបញ្ចាំងក្រៅស្រុកផ្សេងៗទៀតនោះរកចំណូលបាន ២៥៧លានដុល្លារ នាំឱ្យបំណូលសរុបទូទាំងពិភពលោកមានចំនួន ៥៤៨លានដុល្លារ។ លោកស្រី Rebecca Rubin អ្នកសារព័ត៌មានប្រចាំ Variety បានលើកឡើងថាភាពយន្តនេះរកបានចំណូលខ្ពស់បំផុតនៅលើ Box Office បើទោះជាយកទៅប្រៀបធៀបជាមួយនឹងភាពយន្តបញ្ចាំងក្នុងរោងមុនកូវីដ-១៩ ផ្ទុះឡើងក្ដី។
ភាពយន្ត «Top Gun» នេះ Tom Cruise ធ្លាប់សម្ដែងម្ដងកាលពី៣៥ឆ្នាំមុន ដោយសម្ដែងជាតួអង្គ Pete Mitchell ហើយរឿងថ្មីនេះគឺជាបេសកកម្មថ្មីមួយទៀតដែលតួអង្គ Mitchell ត្រូវតែប្រតិបត្តិការ។ វគ្គថ្មីនេះលោកត្រូវសហការជាមួយនឹងតួអង្គឈ្មោះ Bradley ដែលជាកូនរបស់មិត្តសម្លាញ់របស់លោកកាលពីវគ្គទីមួយ។
រឿងនេះត្រូវបានពន្យាពេលម្ដងហើយម្ដងទៀតដោយសារតែបញ្ហាកូវីដ ទម្រាំតែបានបញ្ចាំងកាលពីថ្ងៃទី២៧ ខែឧសភាកន្លងទៅរឿងនេះត្រូវបានពន្យាពេលបញ្ចាំងរហូតដល់ទៅ២ឆ្នាំពេញ៕