ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានបង្ហាញទស្សនៈផ្ទាល់ខ្លួននៅលើបណ្ដាញសង្គមហ្វេសប៊ុកផ្លូវការរបស់ឯកឧត្តមផ្ទាល់ជុំវិញ រឿងការធ្វេសប្រហែសមកលើក្រុមបាល់ទាត់ជម្រើសជាតិកម្ពុជា កំពុងស្ថិតនៅប្រទេសឥណ្ឌា ដើម្បីចូលរួមប្រកួតក្នុងវគ្គជម្រុះពានរង្វាន់បាល់ទាត់ជើងឯកប្រចាំទ្វីបអាស៊ី 2023 AFC Asian Cup qualification ក្នុងពូល D។
ទស្សនៈទាំងស្រុងរបស់ឯកឧត្តម ហ៊ុន ម៉ានី មានខ្លឹមសារដូចខាងក្រោម៖
«នៅពេលការប្រកួតបាល់ទាត់រវាងក្រុមជម្រើសជាតិ៣ ប្រទេស យើងឃើញថា៖
- ឈ្នះ ឬចាញ់គឺជាផ្នែកមួយនៃការប្រកួត
- កម្រិតនៃបដិសណ្ឋារកិច្ចអាស្រ័យលើប្រទេសម្ចាស់ផ្ទះ ឬទីកន្លែងប្រកួត
ជាយ៉ាងណាក៏ដោយ យ៉ាងហោចណាស់ គឺត្រូវយកចិត្តទុកដាក់បំផុត នៅពេលគោរពទង់ជាតិនៃប្រទេសជាភ្ញៀវ។ខ្ញុំបានតាមដានយ៉ាងយកចិត្តទុកដាក់លើអ្វីដែលបានកើតឡើងកាលពីម្សិលមិញក្នុងការប្រកួតក្របខ័ណ្ឌAFC Asian Cup ដែលក្រុមជម្រើសជាតិកម្ពុជាប្រកួតជាមួយក្រុមជម្រើសជាតិឥណ្ឌា ហើយអ្វីដែលបានកើតឡើងក្នុងអំឡុងពេលគោរពទង់ជាតិនៃព្រះរាជាណាចក្រកម្ពុជា។
មិនថាវាជាកំហុស ឬបញ្ហាបច្ចេកទេសទេ ខ្ញុំសង្ឃឹមថានឹងមានការពន្យល់គ្រប់គ្រាន់ទៅលើបញ្ហានេះ។
ក្នុងនាមខ្ញុំជាពលរដ្ឋកម្ពុជា ខ្ញុំគាំទ្រសហព័ន្ធកីឡាបាល់ទាត់កម្ពុជា (FFC) ដើម្បីស្វែងរកចម្លើយ និងការពន្យល់បន្ថែមពី AFC និងម្ចាស់ផ្ទះ។ ខ្ញុំសង្ឈឹមថា នឹងមានការប្រុងប្រយ័ត្នទុកខ្ពស់ជាងមុនសម្រាប់ព្រឹត្តិការណ៍នាពេលអនាគត ដើម្បីកុំឲ្យបញ្ហា/កំហុសនេះកើតឡើងជាថ្មីទៀតសម្រាប់គ្រប់ក្រុមជម្រើសជាតិ។
ជូនចំពោះបងប្អូនជនរួមជាតិ សូមអត់ធ្មត់ រង់ចាំការពន្យល់ និងផ្តោតសំខាន់ក្នុងការគាំទ្រក្រុមជម្រើសជាតិរបស់យើង ដែលគ្រោងនឹងមានការប្រកួតពីរទៀត។ ជាងនេះទៅទៀត ពួកគាត់ត្រូវការការគាំទ្រផ្នែកស្មារតី និងការអបអរសាទរពីពួកយើង។
សូម FFC ដែលមាន ឯកឧត្តមនាយឧត្តមសេនីយ៍ សៅ សុខា ជាប្រធាន បន្តចាត់វិធានការចាំបាច់ទាំងអស់ ដើម្បីការពារក្រុមជម្រើសជាតិយើងពេលដែលពួកគេចេញទៅប្រកួតក្រៅប្រទេស។សម្រាប់ក្រុមជម្រើសជាតិរបស់យើង ទាំងគ្រូបង្វិក និងកីឡាកររបស់យើង យើងមានមោទនភាពចំពោះអ្នកទាំងអស់គ្នា មិនថាក្នុងកាលៈទេសៈអ្វីក៏ដោយ ត្រូវរឹងមាំ និងធ្វើឱ្យអស់ពីសមត្ថភាព! ប្រជាជនទាំង១៦លាននាក់របស់យើងនឹងឈរនៅទីនេះគាំទ្រអ្នកនៅគ្រប់ការប្រកួតតំណាងជាតិ»។
សូមបញ្ជាក់ថាកម្ពុជា ស្ថិតនៅក្នុងពូល D នៃវគ្គជម្រុះ 2023 AFC Asian Cup qualification ជាមួយម្ចាស់ផ្ទះឥណ្ឌា ហុងកុង និងអាហ្វហ្គានីស្ថាន។ ប្រកួតបើកឆាកនៅរាត្រីថ្ងៃទី៨ ខែមិថុនា ឆ្នាំ២០២២ កម្ពុជា បានចាញ់ឥណ្ឌា ២-០ ឯហុងកុង ឈ្នះអាហ្វហ្គានីស្ថាន ២-១។
សម្រាប់ប្រកួតបន្តមាន៖
១១ មិថុនា ២០២២
ម៉ោង ៦:៣០នាទីយប់ កម្ពុជា ប៉ះ ហុងកុង
ម៉ោង ១០យប់ អាហ្វហ្គានីស្ថាន ប៉ះ ឥណ្ឌា