សហព័ន្ធកីឡាបាល់ទះហ្វីលីពីន បានប្រកាសរំសាយចោលពីការប្រកួតមិត្តភាពអន្តរជាតិជាមួយក្រុមកំណាចអាស៊ី ជប៉ុន នៅព្រឹកថ្ងៃព្រហស្បតិ៍ទី១៦ ខែមិថុនា ឆ្នាំ២០២២ នេះភ្លាមៗ ខណៈការប្រកួតនឹងធ្វើឡើងនៅល្ងាចថ្ងៃជាមួយគ្នា ក្រោយខ្លួនមិនអាចធានាសុវត្ថិភាពនិងបញ្ហាសុខភាពរបស់កីឡាករបាន។
ការប្រកួតដែលសហព័ន្ធកីឡាបាល់ទះហ្វីលីពីន ដាក់ឈ្មោះថា PNVF International Challenge នេះត្រូវរៀបចំនៅលើទីលាន FilOil Flying V Centre ក្នុងទីក្រុងម៉ានីល ប្រទេសហ្វីលីពីន។ សហព័ន្ធបានមិនបានប្រកាសបន្ថែមពីការរំលាយជំនួបមិត្តភាពអន្តរជាតិនេះទេ ប៉ុន្តែបានប្រកាសថានឹងសងប្រាក់វិញទៅកាន់អ្នកគាំទ្រដែលបានទិញសំបុត្ររួចរាល់។
អត្ថបទពាក់ព័ន្ធ៖ស៊ីហ្គេម៖ហ្វីលីពីន ថាបាល់ទះបុរសក្នុងសាលកម្ពុជា ស័ក្តិសមនឹងឈ្នះថៃ
ក្រុមជម្រើសជាតិបាល់ទះជប៉ុន ត្រូវធ្វើដំណើរទៅចូលរួមប្រកួតសប្ដាហ៍ទី២ នៃព្រឹត្តិការណ៍ Volleyball Nations League (VNL) ដែលប្រមូលផ្ដុំក្រុមខ្លាំងៗមកពីជុំវិញពិភពលោកប្រចាំសប្ដាហ៍ទី២ ត្រូវធ្វើឡើងនៅកីឡដ្ឋាន Smart Araneta Coliseum ក្នុងប្រទេសហ្វីលីពីន ចន្លោះថ្ងៃទី២១ដល់២៦ខែមិថុនា ឆ្នាំ២០២២។
យ៉ាងណាក្តីសហព័ន្ធកីឡាបាល់ទះហ្វីលីពីន នៅមិនមានការប្រកាសថ្មីណាមួយទេ ជុំវិញប្រកួតមិត្តភាពរវាងក្រុមជម្រើសជាតិខ្លួនជាមួយអាល្លឺម៉ង់ នៅថ្ងៃទី២៧ ខែមិថុនា ឆ្នាំ២០២២ ខាងមុខនោះទេ៕
