ក្រុមកីឡាករបាល់ទាត់ជម្រើសជាតិកម្ពុជាឈរចំណាត់ថ្នាក់លេខ១៧៤ ក្នុងតារាងចំណាត់ថ្នាក់ពិភពលោក (FIFA Ranking) ប្រចាំខែមិថុនា ឆ្នាំ២០២២ នេះបើយោងតាមការបញ្ជាក់របស់គេហទំព័រ FIFA.Com។
ពោលគឺថយចុះពីរចំណាត់ថ្នាក់បើធៀបនឹងខែមុន ក្រោយបរាជ័យឥណ្ឌា ២-០, ហុងកុង ៣-០ និងចុងក្រោយស្មើ ២-២ ជាមួយអាហ្វហ្គានីស្ថាន នៅវគ្គជម្រុះជើងឯកប្រចាំទ្វីបអាស៊ី AFC Asian Cup នៅប្រទេសឥណ្ឌា។
បើធៀបនឹងប្រទេសនៅអាស៊ីអាគ្នេយ៍ កម្ពុជាស្ថិតនៅលេខ៨ ដោយឈរលើឡាវ ព្រុយណេ និងទីម័រខាងកើត។ចំណែកវៀតណាមឈរលេខ១នៅអាស៊ីអាគ្នេយ៍ ដោយស្ថិតនៅលេខ៩៧ ក្នុងតារាង FIFA Ranking រីឯ ថៃលេខ១១១, ហ្វីលីពីនស្ថិតនៅលេខ១៣៣, ម៉ាឡេស៊ីលេខ១៤៧, ឥណ្ឌូណេស៊ីលេខ១៥៥, មីយ៉ាន់ម៉ាលេខ១៥៨, សិង្ហបុរីលេខ១៥៩៕