សម្រាប់អ្នកដែលទស្សនាភាពយន្តឯកសារជីវិតរបស់ក្រុមចម្រៀង ៣នាក់បងប្អូន គឺ SUFFER ដែលមានចំណងជើងថា «ជីវិត៣តន្ត្រីតែមួយ» ប្រាកដណាស់ជាជក់ចិត្តចំពោះការរៀបរាប់ពីជីវប្រវត្តិរបស់សាមជិកក្រុមតន្ត្រីនេះ។
បើទោះបីជាហ្វេន ឬអ្នកមិនទាន់បានស្គាល់អំពីក្រុម SUFFER នៅពេលពួកគេបានទស្សនាភាពយន្តឯកសារមួយនេះហើយ ច្បាស់មែនទែនពួកពិតជាលង់ចិត្តចង់គាំទ្រ SUFFER ដោយមិនដឹងខ្លួន នូវអ្វីដែល SUFFER កំពុងធ្វើ និងកំពុងបង្ហាញពីសមិទ្ធផលកើតចេញពីការតស៊ូរបស់ពួកគេ។
តើអ្នកដឹងទេថា ចុះអ្នកណាអីក៏ពូកែម្លេះក្នុងការផលិតភាពយន្តឯកសារមួយនេះ គ្រាន់តែទស្សនាបានម្ដងសោះក៏ស្ញើចសរសើរអីដល់ម្លឹងទៅ? ចង់ស្គាល់ខ្លាំងណាស់មែនទេ ថ្ងៃសារព័ត៌មានត្រយងសូមបង្ហាញមុខ ផលិតករកុន ឬអ្នកជំនាញកុនឯកសារឆ្នើមមួយរូបដែលមានឈ្មោះថា សុខ ចានរ៉ាដូ ដែលលោកមានស្នាដៃជាច្រើនក្នុងវិស័យភាពយន្តខ្មែរ និងជាទីលើកទឹកចិត្តដល់អ្នកផលិតកុនខ្មែរជំនាន់ក្រោយឱ្យកាន់តែមានកម្លាំងចិត្តស្រឡាញ់ការផលិតភាពយន្តឯកសាររបស់ខ្មែរ។
ជាមួយស្នាដៃដែលទើបតែបញ្ចេញចុងក្រោយនេះ ភាពយន្តឯកសារ «ជីវិត៣តន្ត្រីតែមួយ» លោក សុខ ចាន់រ៉ាដូ បានលើកឡើងថា ជំហ៊ានដំបូងដែលលោកចាប់ផ្ដើមគិត ដើម្បីធ្វើភាពយន្តឯកសារឱ្យក្រុមចម្រៀង SUFFER នោះគឺពាក្យថា តន្ត្រី ។ ចេញពីពាក្យគន្លិះមួយនេះ លោកចាប់ផ្ដើមស្រម៉ៃថា តើភាពយន្តឯកសារដែលលោកគម្រោងថតនោះ ចង់បង្ហាញពីអ្វីខ្លះទៅកាន់ហ្វេន ឬក៏មហាជនឱ្យស្គាល់អ្វីពីទៅជា តន្ត្រី និង SUFFER ?។ លោក សុខ ចានរ៉ាដូ បានសម្លឹងឃើញថា SUFFER មានសមាជិក ៣នាក់បងប្អូន ហើយសុទ្ធតែជាអ្នកស្រឡាញ់ និងប្រឡូកក្នុងសិល្បៈតន្ត្រីដូចគ្នា ហើយតាមជំនាញរៀងខ្លួនមាន ដៃស្គរ ដៃហ្គីតាបាស់ និងដៃហ្គីតាសូឡូ។ ក្រៅពីបងប្អូនទាំង៣ជាអ្នកសិល្បៈហើយ សូម្បីតែក្រុមគ្រួសារ រាប់តាំងពីឪពុក ម្ដាយ និងប្អូនស្រី ក៏ជាអ្នកសិល្បៈដែរ និយាយទៅគឺជាចង្កោមគ្រួសារអ្នកសិល្បៈតែម្ដង។
ភាពយន្តនេះមិនមែនឆ្លុះបង្ហាញតែពីប្រវត្តិរូបក្រុមគ្រួសារសិល្បៈមួយនេះឱ្យមហាជនបានជ្រាបទេ លោក សុខ ចានរ៉ាដូ បង្ហាញថា ការតស៊ូ ការពុះពារជម្នះឧសគ្គក្នុងជីវិត និងការផ្សះផ្សារគ្នាដែលបងប្អូនទាំង ៣នាក់នេះធ្លាប់ឆ្លងកាត់ ក៏ជាបទពិសោធន៍ល្អសម្រាប់ឱ្យមហាជនទទួលយកដែរ។ ខ្សែជីវិតឆ្លងកាត់មក ២០ឆ្នាំជាង តែត្រូវបានផលិតករភាពយន្តឯកសាររូបនេះ សម្រាយយ៉ាងសង្ខេបឱ្យទស្សនាត្រឹមតែ ២៤ នាទីតែប៉ុណ្ណោះ។ ចុះសួរថា តើផលិតបែបម៉េច លំបាកទេ? ពិតណាស់ហើយ គឺលំបាកខ្លាំងណាស់ កត្តាពេលវេលាផង ចំណាយពេលស្រាវជ្រាវផង ចងក្រងឯកសារផង នោះគឺមិនងាយនឹងឱ្យផលិតចេញបានយ៉ាងល្អបែបនេះណាស់។
ចំនុចសំខាន់ក្នុងភាពយន្តឯកសារ«ជីវិត៣តន្ត្រីតែមួយ» លោក សុខ ចានរ៉ាដូ បន្តថា ក្រុមចម្រៀង SUFFER ធ្លាប់ដើរដល់ចំណុចរកាំរកូសហើយបែកបាក់សាមគ្គីភាពគ្នា ក៏ប៉ុន្តែអ្វីដែលមិនអាចកាត់ផ្ដាច់បានគឺឈាមជ័រជាបងប្អូន ដែលចំណុចនេះធ្វើឱ្យ SUFFER បោះជំហ៊ានបានដល់ទៅ ១០ឆ្នាំក្នុងវិស័យតន្ត្រីបងប្អូន។ ផ្ទុយពីក្រុមតន្ត្រីដទៃដែលមិនមែនជាបងប្អូនគ្នា កាលបើបំបែកក្រុមហើយ កម្រណាស់ដែលឃើញពួកគេងាកមកចាប់ដៃគ្នាវិញ ហើយមានខ្លះទៀត សឹងតែមិនមើលមុខ និងមិននិយាយរកគ្នាទៀតផង។ ទាំងអស់នេះហើយដែលលោក សុខ ចានរ៉ាដូ លើកយកមកបង្ហាញអ្វីដែលក្រុមចម្រៀង SUFFER មាន ចេញពីបទពិសោធន៍ជីវិតផ្ទាល់ឱ្យអ្នកទាំងអស់គ្នាទស្សនា។
ក្រៅពីស្នាដៃភាពយន្តឯកសារ «ជីវិត៣តន្ត្រីតែមួយ» លោក សុខ ចានរ៉ាដូ ក៏មានស្នាដៃមួយរឿងទៀតដែលមិនអាចមើលរំលងបានគឺរឿង «សំឡេងរាត្រី» ជាភាពយន្ដខ្លីដែលរម្លឹកពីអតីតកាលនៃការចងចាំជាង២០ឆ្នាំមុនរបស់លោកផ្ទាល់ធ្លាប់ជាអតីតក្មេងប្រុសរស់នៅក្នុងអគារប៊ូឌីង។ ភាពយន្តនេះ នឹងបង្ហាញខ្លួនក្នុងមហោស្រពភាពយន្តអន្តរជាតិកម្ពុជាលើកទី ១១ ឆាប់ៗនេះ បន្ទាប់ពីដើរបញ្ចាំងនៅក្រៅជាង ១០ ប្រទេសរួចមកហើយ៕
សូមទស្សនាវីដេអូនេះ ៖