Xavier Alexander Musk ជាកូនប្រុសរបស់មហាសេដ្ឋី Elon Musk ដែលដើមឡើយមានភេទជាបុរស ហើយបានវះកាត់ប្ដូរភេទជាស្រ្តី បានប្ដឹងទៅតុលាការដើម្បីផ្លាស់ប្ដូរឈ្មោះដោយសម្អាងលើភេទថ្មី និង ហេតុផលដែលនាងមិនចង់មានទំនាក់ទំនងជាមួយឪពុករបស់ខ្លួន គឺ លោក Elon Musk ឡើយ។
Xavier Alexander Musk បានដាក់ពាក្យស្នើសុំទៅតុលាការទីក្រុង Los Angeles County Superior Court ក្នុងតំបន់ Santa Monica កាលពីខែ មេសា ថា នាងទើបតែឈានចូលវ័យ ១៨ឆ្នាំ ដែលជាអាយុស្របច្បាប់នៅរដ្ឋ California នាងបានស្នើសុំតុលាការឲ្យប្ដូរការទទួលស្គាល់ភេទរបស់នាងពីបុរសទៅជាស្រ្តី និង ចុះបញ្ជីឈ្មោះថ្មីថា Vivian Jenna Wilson ដោយយកត្រកូលតាមម្ដាយដែលជា អតីតភរិយាលោក Elon Musk ដែលលែងលះគ្នាកាល ពីឆ្នាំ ២០០៨ គឺ អ្នកស្រី Justin Wilson។
បច្ចុប្បន្ននេះ មិនមានព័ត៌មានច្បាស់លាស់ណាមួយអំពីជម្លោះរវាងកូន និង ឪពុក នោះទេ ខណៈមេធាវីរបស់មហាសេដ្ឋី Elon Musk និង មន្រ្តីទំនាក់ទំនងប្រពន្ធផ្សព្វផ្សាយរបស់ក្រុមហ៊ុន Tesla មិនអាចទទួលយកបាននាពេលបច្ចុប្បន្ននេះ ហើយក៏មិនមានការបញ្ជាក់បន្ថែមពីការប្រេះឆារវាងអ្នកទាំង២ ដែរ។
ទីភ្នាក់ងារព័ត៌មាន Reuters បានរាយការណ៍ថា ត្រឹមតែ ១ខែ ក្រោយពីអតីតនាង Xavier Alexander Musk បានដាក់ញត្តិស្នើទៅតុលាការសម្រាប់ការប្ដូរនាមត្រកូល និង ភេទ លោក Elon Musk បានប្រកាសគាំទ្រចំពោះគណបក្សសាធារណរដ្ឋ ដែលជាគណបក្សដែលគាំទ្រការរឹតបន្តឹងសិទ្ធិរបស់អ្នកប្ដូរភេទនៅក្នុងរដ្ឋនានានៅទូទាំងសហរដ្ឋអាមេរិក។ បន្ថែមពីនេះ លោក Musk ក៏ធ្លាប់បានបញ្ចេញមតិលើបណ្ដាញសង្គមថា «ពិតណាស់ ខ្ញុំគាំទ្រអ្នកកែភេទ ប៉ុន្ដែការផ្លាស់ប្ដូរសព្វនាមដើម្បីហៅមនុស្សទាំងនោះ គឺជា សុបិន្តអាក្រក់»៕
