មហោស្រពអន្តរជាតិកម្ពុជាលើកទី១១ នឹងប្រព្រឹត្តិទៅចាប់ពីថ្ងៃទី ២៨ ខែមិថុនា ឆ្នាំ២០២២នេះតទៅ ដែលប្រមូលម្ដុំភាពយន្ត ១៤៤ ចំណងជើងមកពី២៦ប្រទេសខុសៗគ្នា ដែលមានទាំងភាពយន្តខ្នាតខ្លី ភាពយន្តខ្នាតវែង ភាពយន្តឯកសារ និងគំនូរជីវចល។
ក្នុងនោះដែរ ភាពយន្ត «បូឌីញស» របស់សមិទ្ធករ នាង កាវិច ក៏មានវត្តមានក្នុងការបញ្ចាំងឱ្យមហាជនបានទស្សនាផងដែរ។ លោក នាង កាវិច បានដកស្រង់ប្រវត្តិពិតរបស់លោកក្នុងអំឡុងពេលស្នាក់នៅក្នុងអាគារប៊ូឌីញដែលជាសំណង់ចាស់មួយក្នុងរាជធានីភ្នំពេញ មកផលិតជាខ្សែភាពយន្ដដ៏មានគុណភាព។ ភាពយន្ដមួយនេះ បានចូលទៅដណ្ដើមពានរង្វាន់ នៅក្នុងមហោស្រពភាពយន្ត ក្រុងVenice លើកទី ៧៨ នៅប្រទេសអ៊ីតាលី កាលដើមខែកញ្ញាឆ្នាំមុន និងបាននាំមោទកភាពជូនកូនខ្មែរគ្រប់រូប។
សម្រាប់ផលិតករខ្មែរ លោក នាង កាវិច ជាកូនខ្មែរ និងផលិតករខ្មែរទី១ ដែលបាននាំយកខ្សែភាពយន្តទៅប្រកួតប្រជែងក្នុងមហោស្រពអន្តរជាតិ ក្រុង Venice ដែលជាមហោស្រពខ្សែភាពយន្តអន្តរជាតិចំណាស់ជាងគេបង្អស់ក្នុងពិភពលោក។
ក្រៅពីនោះ ខ្សែភាពយន្តនេះ ធ្លាប់ទទួលបានការចាប់អារម្មណ៍ខ្លាំងនៅរោងភាពយន្តប្រទេសបារាំង និងបានធ្វើដំណើរទៅកាន់ទីក្រុងបែលស៊ីក មហោស្រពភាពយន្ដ Namur International French Language Film Festival ទីក្រុងឡុងដ៍ ក្នុងមហោស្រព BFI London Film Festival ទីក្រុងប៊ូសាន មហោស្រព Busan International Film Festival និងទីក្រុងឈីកាហ្គូ Chicago Film Festivalផងដែរ។
តទៅនេះ សូមស្ដាប់បទសម្ភាសន៍របស់លោក នាង កាវិច ចំពោះស្នាដៃ «បូឌីញស» ដែលគ្រោងបញ្ចាំងក្នុងមហោស្រពភាពយន្តអន្តរជាតិកម្ពុជា៖