ប្រមុខកងកម្លាំងប្រដាប់អាវុធរបស់ហ្វាំងឡង់ លោក Timo Kivinen បាននិយាយថា ប្រទេសរបស់ខ្លួនបានត្រៀមខ្លួនអស់ជាច្រើនទសវត្សរ៍សម្រាប់ការវាយប្រហាររបស់រុស្ស៊ី ហើយនឹងតស៊ូយ៉ាងម៉ឺងម៉ាត់ដល់ដំណាក់កាលចុងក្រោយ ប្រសិនបើវាកើតឡើងមែននោះ។
ការលើកឡើងរបស់ហ្វាំងឡង់នេះកើតឡើង ស្របពេលដែលពិភពលោកកំពុងភ័យខ្លាចថា សង្រ្គាមលោកលើកទី៣ អាចនឹងផ្ទុះឡើង។
ប្រទេស Nordic មួយនេះ បានបង្កើតឃ្លាំងអាវុធដ៏ច្រើន ប៉ុន្ដែក្រៅពីផ្នែកយោធា កត្តាសំខាន់មួយគឺ ប្រជាជនហ្វាំងឡង់ក៏បានលើកទឹកចិត្តឲ្យប្រយុទ្ធដែរ នេះបើតាមការលើកឡើងរបស់ប្រមុខកងកន្លាំងប្រដាប់អាវុធ លោក Kivinen បានឲ្យដឹងក្នុងបទសម្ភាសន៍មួយនៅក្នុងប្រទេសនេះ។
លោកបន្ដថា «យើងបានបង្កើតប្រព័ន្ធការពារយោធារបស់យើងយ៉ាងជាក់លាក់ សម្រាប់ប្រភេទនៃសង្រ្គាមដែលកំពុងផ្ទុះឡើងនៅអ៊ុយក្រែន ជាមួយនឹងការប្រើប្រាស់កម្លាំងអាវុធ កងកម្លាំងពាសដែក និង កងកម្លាំងអាកាសផងដែរ។ លោកថា អ៊ុយក្រែនជាប្រទេសដែលរុស្ស៊ីពិបាកវាយ ដូច្នេះគោលដៅបន្ទាប់គឺជាប្រទេសហ្វាំងឡង់»។
ហ្វាំងឡង់បានធ្វើសង្រ្គាម ២លើក ក្នុងទស្សវត្សរ៍ឆ្នាំ ១៩៤០ ប្រឆាំងនឹងអ្នកជិតខាងភាគខាងកើតរបស់ខ្លួន ដែលមានព្រំដែន ១៣០០គីឡូម៉ែត្រ។ ចាប់តាំងពីសង្រ្គាមលោកលើកទី២ មក ទីក្រុង ហែលស៊ិនគី បានរក្សាការត្រៀមលក្ខណៈយោធាក្នុងកម្រិតខ្ពស់ជានិច្ច។
ប្រទេសដែលមានប្រជាជនចំនួន ៥,៥លាននាក់ មានកម្លាំងទាហានក្នុងសម័យសង្រ្គាមចំនួន ២៨០,០០០នាក់ ដោយមាន ៨៧០,០០០នាក់ ត្រូវបានបណ្ដុះបណ្ដាលជាទាហានបម្រុង។
សូមជម្រាបថា ហ្វាំងឡង់មិនបានលុបចោលការរើសទាហានដូចប្រទេសលោកខាងលិចទេ បន្ទាប់ពីការបញ្ចប់សង្រ្គាមត្រជាក់មក៕
