ក្នុងជំនួបរវាងបឹងកេត ជាមួយណាហ្គាវើល ក្នុងប្រកួតសប្ដាហ៍ទី៨ នៃពានរង្វាន់លីគកំពូលកម្ពុជា Cambodian Premier League 2022 នៅល្ងាចថ្ងៃសៅរ៍ ទី២៥ ខែមិថុនា ឆ្នាំ២០២២ លើទីលានកីឡដ្ឋាន Cambodia Airway ត្រូវបានលោកអាជ្ញាកណ្ដាល លឹម ប៊ុនធឿន ពិន័យកាតសរុប១៩សន្លឹកឯណោះ ខណៈលទ្ធផលបញ្ចប់ទៅក្រុមភ្ញៀវណាហ្គាវើល យកឈ្នះម្ចាស់ផ្ទះបឹងកេត ១-០។
នៅក្រោយអាជ្ញាកណ្តាលផ្លុំកញ្ចែបញ្ចប់ការប្រកួតមានការប៉ះពាក្យសម្តីគ្នារវាងកីឡាករអ៊ីរ៉ង់ Taher Jahanbakhsh របស់បឹងកេត ជាមួយកីឡាករ គួច ដានី របស់ណាហ្គាវើល ហើយឈានផ្ទុះទៅជាការប៉ះទង្គិចធំ។
បើទោះជាការប្រកួតនេះថែមម៉ោងបង្រ្គប់នៅតង់ទី២តែ៤នាទីក្តី តែការប្រកួតពន្យាដល់៦នាទី ខណៈកីឡាករនិងថ្នាក់ដឹកនាំដែលត្រូវពិន័យកាតមាន៖
*កាតលឿង៖
-ណាហ្គាវើល (៧សន្លឹក) សុះ ស៊ូហាណា 24′ , Soares Da Costa Osvaldo 32′, គួច ដានី 35′, Cristian Roque 53′ , រ៉ៃ វិកទ័រ 57′ , ភេម តៅសិញ 73′ , ឆៃ រ័ត្នសេរី 90+5។
-បឹងកេត (៣សន្លឹក) Taher Jahanbakhsh 33′, ឱ ភារុណ 76′ , តាំង ប៊ុនឆៃ 90+6′
*កាតក្រហម៖
-ណាហ្គាវើល (៥សន្លឹក) នេន សុធារ័ត្ន, Súper, Cristian Roque, ផាត សុខា, រ៉ៃ វិកទ័រ នាទី90+6′ ដូចគ្នា
-បឹងកេត (៤សន្លឹក) កយ សាលឹម, Taher Jahanbakhsh, ហៅ សុជាតិ, លី រ៉ាវី នាទី 90+6′ ដូចគ្នា
ក្រោយចប់ការប្រកួត១ថ្ងៃលោកស្រី ពុធ ធីតា គឺនៅព្រឹកថ្ងៃអាទិត្យ ទី២៦ ខែមិថុនា ឆ្នាំ២០២២ បានបញ្ជាក់លើហ្វេសប៊ុកលោកស្រីថា៖«ឆ្លងការប្រកួតពីម្សិលមិញរវាងក្រុមណាហ្គាវើល នឹង ក្រុមបឹងកេត ការឈ្នះចាញ់វាជាការធម្មតានៅក្នុងវិស័យកីឡា ក៏ប៉ុន្តែរឿងដែលមិនគួរកើតគឺការវិវាទទាស់ពាក្យសំដីគ្នាក្នុងកំឡុងការប្រកួតរហូតឈានដល់ការឌឺដង ការវិវាទប្រតាយប្រតប់គ្នាក្រោយការប្រកួតចប់ របស់ក្រុមការងារ នឹងកីឡាករ រវាងក្រុមទាំងពីរ»។
ប្រធានក្លិបជាស្រ្តីម្នាក់ក្នុងចំណោម២នាក់ដែលកំពុងឈរជើងក្នុងពានរង្វាន់លីគកំពូលកម្ពុជា បន្តថា៖«ត្រូវចាំថាវិស័យបាល់ទាត់យើងទំរាំបានដល់ថ្ងៃនេះ មានអ្នកចូលរួមច្រើនណាស់ដោយចំណាយទាំងកំលាំងកាយចិត្ត ថវិកាពេលវេលាមកគាំទ្រ..ហើយយើងក៏ជាគំរូដល់យុវជនជំនាន់ក្រោយដ៏សំខាន់មួយ មិនតែប៉ុណ្ណោះអ្នកទាំងអស់គ្នាជាមិត្តរួមអាជីព មិត្តធ្លាប់រួមក្រុមការងារក្នុងវិស័យកីឡាមួយនេះ ពិតជាមិនគួរកើតឡើងទាល់តែសោះអ្នកទាំងអស់គ្នាពិចារណាទៅមើលតើគួរយើងមានអារម្មណ៍ខ្មាស់ខ្លួនឯងទេ បំបាក់ទឹកចិត្តអ្នកគាំទ្រទេ?តើចង់អោយវិស័យនេះទៅមុខរឺថយក្រោយ????ដោយសារទង្វើរបស់អ្នកទាំងអស់គ្នា អ្នកណាទៅហ៊ាននាំកូន បង ប្អូនមកមើលទៀត ???? បើគ្មានអ្នកគាំទ្រតើវិស័យនេះអាចទៅមុខទេ ? អ្នកទាំងអស់គ្នាត្រូវចាំនូវការប្រកួតដ៏អាម៉ាស់មួយនេះ នឹងកែប្រែនូវកំហុសរបស់ខ្លួនទោះបីចេតនាក្តី អចេតនាក្តី ! អ្នកទាំងអស់គ្នាត្រូវចាំថា បាល់ឡូន ដែលអាចហោះខ្ពស់បានគឺផ្ទុកនូវខ្យល់កំដៅនៅខាងក្នុង ផ្ទុកបានកាន់ច្រើនប៉ុណា្ណនឹងកាន់តែហោះបានខ្ពស់ប៉ុណ្ណោះ ធ្វើជាអ្នកឈ្នះអោយនៅក្នុងចិត្តអ្នកចាញ់ ធ្វើជាអ្នកចាញ់ដោយទឹកចិត្តអ្នកកីឡា»។
សូមបញ្ជាក់ថាកីឡាករ ស៊ុះ ស៊ូហាណា ជាម្ចាស់គ្រាប់បាល់ជ័យជម្នះឱ្យណាហ្គាវើល នៅនាទី៦២៕
រូបថត៖ CPL និង Puth Thyda