សួនច្បារនៃបរិវេណ ព្រះរាជដំណាក់ខេត្តសៀមរាបបានសាងសង់សឹងតែរួចរាល់ជិត១០០%ទៅហើយ ថែមទាំងបើកទទួលភ្ញៀវទេសចរ ទាំងជាតិ និងអន្តរជាតិតាំងពីដើមឆ្នាំ ២០២២មកម្ល៉េះ។
យ៉ាងណាមិញតាមប្រភពដែលសារព័ត៌មានត្រយងបានទទួលឱ្យដឹងថា គម្រោងរូបសំណាកមេទ័ពធំៗសម័យអង្គរទាំង ៧ ស្ថិតក្នុងគម្រោងសាងសង់ដាក់នៅបរិវេណសួនច្បារ ព្រះរាជដំណាក់ខេត្តសៀមរាប ក៏កំពុងលេចចេញជារូបរាងបណ្ដើរៗហើយ។
ផ្អែគតាមការបង្ហោះនៅហ្វេសប៊ុក Chanchhaya Phnom Penh Palace បានបង្ហាញរូបភាពជាច្រើនសន្លឹកពីរូបភាពមេទ័ពសម័យអង្គរ ក្នុងកាយវិការ ឈរយ៉ាងប្រុងប្រយ័ត្ន និងអង់អាចក្លាហាន ដែលត្រៀមដាក់នៅមុខសួនច្បារព្រះរាជដំណាក់ ហើយរូបនោះគឺធ្វើដោយស្នាដៃកូនខ្មែរយ៉ាងល្អឥតខ្ចោះ។
ផ្អែកលើរូបភាពដែលទម្លាយនៅលើបណ្ដាញសង្គមហ្វេសប៊ុក គេមើលឃើញថា រូបសំណាកមេទ័ពសម័យអង្គរដែលនឹងត្រូវសាងសង់គឺមានចំនួន ៧រូប ដែលកម្ពស់ ២ម៉ែត្រ ដោយមិនគិតខឿន និងបានដកស្រង់ចេញពីចម្លាក់នៅ ប្រាសាទនានា ជាពិសេសគឺប្រាសាទបាយ័ន និងប្រាសាទអង្គរវត្ត។ មេរូបសំណាកមេទ័ពសម័យអង្គរចំនួន ៧រូប ប្រដាប់ដោយសំលៀកបំពាក់ គ្រឿងការពារខ្លួន និងអាវុធក្នុងដៃខុសៗគ្នា មានដូចជា កាំបិត ដាវ លំពែង ធ្នូ ផ្គាក់ និងខែលការពារជាដើម៕
