ក្លិបបាល់ទាត់នគរបាលជាតិ ក្រោមការដឹកនាំរបស់លោក អ៊ុង កនយ៉ានិត បានប្រកាសនាំចូលកីឡាករចំនួន២រូបគឺ ESOH OMOGBA និងកីឡាករ ADEYAJU RESHEED OMOKAFE ត្រៀមចូលរួមការប្រកួតជម្រើសជើងឯកជាតិលីគទី២ (Cambodian League 2) រដូវកាលឆ្នាំ២០២២។
ខ្សែប្រយុទ្ធ Omokafe វ័យ២៧ឆ្នាំ គឺកីឡាករសំបូរបទពិសោធន៍ ក្រោយឆ្លងកាត់ជាច្រើនដូចជា៖ ក្លិបបៀលប្រាយយូណាយធីត, ណាហ្គាវើលដ៍, គិរីវង្សសុខសែនជ័យ, កងយោធពលខេមរភូមិ(ទ័ព) និងចុងក្រោយ អាសុីអឺរ៉ុប យូណាយធីត។
ខណ:ខ្សែបម្រើ-ប្រយុទ្ធ ជនជាតិនីហ្សេរីយ៉ា Esoh Paul Omogba ដែលធ្លាប់មានបទពិសោធន៍ច្រើនលើទីលានក្នុងលីគកំពូលកម្ពុជា។ ដោយរូបគេបានធ្វើដំណើរមកកាន់ប្រទេសកម្ពុជា ដំបូងនៅឆ្នាំ២០១៦ ដោយកាលនោះបានចូលរួមជាមួយក្រុមបឹងកេត ហើយនៅឆ្នាំ២០១៧ បានចូលរួមក្រុម Yadanarbon FC នៅមីយ៉ាន់ម៉ា តែត្រឡប់មកចូលរួមបឹងកេតវិញ។
នៅឆ្នាំ២០១៩ រូបគេបានចេញពីបឹងកេត ចូលរួមជាមួយក្រុមណាហ្គាវើល និងឆ្នាំ២០២០ បានចូលរួមជាមួយក្រុមភ្នំពេញក្រោន។ រូបគេធ្លាប់ឈ្នះជើងឯកពានរង្វាន់លីគកំពូលកម្ពុជាឆ្នាំ២០១៧ និងឈ្នះជើងឯករងនៅឆ្នាំ២០១៨និង២០១៩ ផងដែរ៕
