មន្រ្តីប៉ូលីសនៃប្រទេសកាណាដា បានបាញ់សម្លាប់ជនសង្ស័យ ២នាក់ ក្នុងការបាញ់ប្រហារគ្នាកាលពីថ្ងៃ អង្គារ នៅឯធនាគារមួយកន្លែងក្នុងខេត្ត Bristish Columbai ភាគខាងកើតប្រទេសកាណាដា ហើយក៏បានបណ្ដាលឲ្យមន្រ្តីប៉ូលីសចំនួន ៦នាក់ បានរងរបួស ខណៈដែលអ្នកនៅក្បែរនោះត្រូវបានជម្លៀសចេញ បន្ទាប់ពីកើតមានការផ្ទុះអាវុធ។
ក្រុមមន្រ្តីប៉ូលីសកាណាដា បានធ្វើដំណើរទៅដល់កន្លែងកើតហេតុដែលស្ថិតនៅធនាគារ Montreal ក្នុងទីក្រុង Saanich លើកោះ Vancouver នៃខេត្ត Bristish Columbai បន្ទាប់ពីទទួលបានសេចក្ដីរាយការណ៍ថា មានបរុស ២នាក់ប្រដាប់ដោយអាវុធជាច្រើនដើម ព្រមទាំងពាក់អាវក្រោះការពារខ្លួន បានដើរចូលទៅក្នុងធនាគារ ដែលគេសង្ស័យថា អាចជាសកម្មភាពប្លន់ធនាគារ។ ការផ្ទុះអាវុធនេះបានចាប់ផ្ដើមនៅពេលដែលពួកជនសង្ស័យទាំង ២នាក់ ដើរចេញពីធនាគារវិញ ប៉ុន្ដែសំណាងល្អ ហេតុការណ៍នេះមិនបានបង្កឲ្យជនស៊ីវិលណាម្នាក់រងរបួសឡើយ។
ក្រោយការបាញ់ប្រយុទ្ធគ្នា ខ្មាន់កាំភ្លើងទាំង ២នាក់នោះ បានបាត់បង់ជីវិតនៅនឹងកន្លែងកើតហេតុ ចំណែកមន្រ្តីប៉ូលីសចំនួន ៦នាក់ ក៏បានរងរបួសដោយគ្រាប់កាំភ្លើងផងដែរ ប៉ុន្ដែហាក់ពុំបានបង្កការគំរាមកំហែងដល់អាយុជីវិតនោះទេ៕