ដំណឹងមរណ.ភាពរបស់អ្នកនាង ស៊ិន ឧត្តមផល្លាបានធ្វើឱ្យមិត្តអ្នកសិល្បៈនិងមហាជនមានការរន្ធត់ ស្រណោះនិងសោកស្ដាយជាពន់ពេកណាស់ ដោយក្នុងនោះអ្នកនាង ខាត់ សុឃីមដែលជាតារាមានសមត្ថភាពពហុជំនាញក៏នៅស្រណោះអាឡោះអាល័យ និង រំលឹកដល់អនុស្សាវរីយ៍ជាមួយគ្នានាពេលកន្លងមកដែរ។
សូមចុចអាន៖ សោកស្ដាយណាស់! អ្នកនាង ស៊ិន ឧត្តមផល្លាបានទទួលមរណ.ភាពហើយដោយជំងឺមហារីក
នៅក្នុងសំណេរដែលអ្នកនាង ខាត់ សុឃីម បានបង្ហោះនៅលើគណនីហ្វេសប៊ុករបស់អ្នកនាងបានរៀបរាប់និងរំលឹកអនុស្សាវរីយ៍ដ៏ស្និទ្ធស្នាលរវាងអ្នកទាំងពីររយៈពេល២០ឆ្នាំ ពោលគឺចាប់តាំងពីអំឡុងឆ្នាំ១៩៩៦/១៩៩៧ដោយក្នុងនោះអ្នកនាងក៏បន់ផ្សងសុំឱ្យ ដួងវិញ្ញាណក្ខន្ធអ្នកនាង ស៊ិន ឧត្តមផល្លាកើតជាតិក្រោយកុំបីអភ័ព្វដូចជាជាតិនេះ។
«(លាហើយសម្លាញ់ ទៅមុនហើយហី) ក្នុងនាមនាងខ្ញុំជាសិល្បៈជំនាន់ 1996/1997ដំណាលនឹង អ្នកនាង ស៊ិន ឧត្តមផល្លា ជាមិត្តក្លើ ដ៏ស្និទ្ធស្នាល អស់រយៈពេលជាង ២០ឆ្នាំ ខ្ញុំពិតជាសោកស្តាយជាពន់ពេក ដោយសម្លាញ់របស់ខ្ញុំ គាត់បានកើតជម្ងឺ មហារីកដ៏ធ្ងន់ធ្ងរ រហូតគាត់ទ្រាំទ្រលែងបាន…លាចាកលោកនេះហើយសូមសម្លាញ់ទៅអោយបានសុខ កើតជាតិណាៗ កុំបីអភ័ព្វដូចជាតិនេះ... គ្នានឹងចងចាំសម្លាញ់ជារៀងរហូត ( មិត្តល្អ ) ស៊ិន ឧត្តមផល្លា ….»។
ក្រៅអំពីអ្នកនាង ខាត់ សុឃីម ដែលជាមិត្តល្អស្គាល់គ្នាជាង ២០ឆ្នាំ នៅលើវិថីសិល្បៈ ក៏មានបងប្អូនអ្នកសិល្បៈទាំងចាស់និងក្មេងជាច្រើនរូបបានសម្ដែងនូវការសោកស្ដាយចំពោះការបាត់បង់នូវធនធានសិល្បៈរូបនេះ ហើយបួងសួងឱ្យដួងវិញ្ញាណក្ខន្ធអ្នកនាងបានសុខស្ងប់៕