នៅសុខៗ ស្រាប់តែគណនីហ្វេសប៊ុករបស់បងប្រុសកំពូលតារាចម្រៀងខេមរ: សិរីមន្ត គឺលោក ខេមរ: ភារុណ បានបន្តរៀបរាប់ម្ដងជាពីរដងពីគោលបំណងនិងមូលហេតុដែលលោកចង់ក្លាយជាអភិបាលរាជធានី។
កាលពីថ្ងៃអាទិត្យ (៣០ ឧសភា) គណនីហ្វេសប៊ុក ដែលមានឈ្មោះជាភាសាអង់គ្លេសថា Chau Sopanha ដែលត្រូវបានមិត្តភក្ដិនិងមហាជនមួយចំនួនដឹងថាជារបស់អ្នកនិពន្ធបទចម្រៀងមានឈ្មោះបោះសំឡេងមួយរូបគឺលោក ខេមរ: ភារុណ ឬ មានឈ្មោះពិតថា ខែម ភារុន ត្រូវជាបងប្រុសបង្កើតកំពូលតារាចម្រៀងល្បីប្រចាំផលិតកម្មហង្សមាស ខេមរ: សិរីមន្ត បានបន្តផុសសំណេររៀបរាប់ខ្លីៗពីគោលបំណងដែលលោកចង់ក្លាយទៅជាអភិបាលខេត្តរាជធានីមួយរូប ប្រសិនបើសម្ដេចតេជោ ហ៊ុន សែន នាយករដ្ឋមន្ត្រីផ្ដល់នូវសេចក្ដីទុកចិត្តចំពោះរូបលោក។
សំណេរលើកទីមួយ ដែលលោកបង្ហើបថាចង់លោកចង់ធ្វើជាអភិបាលរាជធានីភ្នំពេញមានសេចក្ដីរៀបរាប់យ៉ាងដូច្នេះថា៖
«ពាក់ឈុតបែបហ្នឹងសមធ្វើជាអភិបាលខេត្តរាជធានីបានអត់? បើបានធ្វើវិញខ្ញុំធានាមិនអោយសម្តេចនិងប្រជាជនយើងខកចិត្តឡើយ។»
បន្តិចក្រោយមកទៀត អ្នកនិពន្ធចម្រៀងដ៏ពូកែរូបនេះក៏បានផុសរូបលោកមួយសន្លឹក ហើយសរសេរអមភ្ជាប់បញ្ជាក់ពីទីតាំងថាលោកកំពុងស្ថិតនៅក្នុងសាលាក្រុងសិនចិនរបស់ប្រទេសចិន។
ចុងក្រោយបង្អស់ លោក ខេមរ: ភារុណ បានបញ្ជាក់ថាមហិច្ឆតាធំរបស់ខ្លួននេះគឺដើម្បីប្រទេសជាតិ និង ប្រជាជន៖
«ខ្ញុំចង់ធ្វើជាអភិបាលខេត្តរាជធានីមិនមែនដើម្បីផលប្រយោជន៍ខ្ញុំនោះទេ សំខាន់ផលប្រយោជន៍ទាំងនោះបានទៅលើប្រទេសប្រជាជននិងរាជរដ្ឋាភិបាលខ្មែរយើងទៅវិញទេ។ប្រសិនបើសម្ដេចប្រធានគណបក្សប្រជាជនកម្ពុជាជាប្រមុខរាជរដ្ឋាភិបាលលោកផ្តល់សេចក្តីទឹកចិត្តដល់ខ្ញុំ។»
បច្ចុប្បន្នលោក ខេមរៈ ភារុណ មិនត្រឹមតែជាអ្នកនិពន្ធបទចម្រៀងមួយរូបប៉ុណ្ណោះទេ ប៉ុន្តែលោកមានឋានន្តរសក្តិជាមន្ត្រីយោធាតួនាទីឧត្តមសេនីយ៍ត្រី (ផ្កាយ១) នៅក្នុងក្រសួងការពារជាតិផងដែរ។
នៅខាងក្រោមសំណេររបស់លោកដែលបានផុសលើបណ្ដាញសង្គមក៏មានបងប្អូនមិត្តភក្ដិជាច្រើននាក់បានចូលមកអបអរសាទរនិងគាំទ្រយ៉ាងពេញទំហឹងប្រសិនបើលោកបានធ្វើជាអភិបាលរាជធានីដូចជាការរំពឹងទុករបស់លោកយ៉ាងពិតប្រាកដមែននោះ៕
