ប្រតិភូប៉ារ៉ាឡាំពិកកម្ពុជា ដែលដឹកនាំដោយឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា ព្រមទាំងជាអនុប្រធានគណៈកម្មាធិការជាតិប៉ារ៉ាឡាំពិកកម្ពុជា ចាកចេញពីមាតុប្រទេសនៅថ្ងៃទី២៦ ខែកក្កដា ឆ្នាំ២០២២ នេះ ដើម្បីទៅចូលរួមប្រកួតព្រឹត្តិការណ៍អាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី។
ប្រតិភូសរុបរបស់កម្ពុជា មានចំនួន១៥៤នាក់ បានចាកចេញនៅវេលាម៉ោង១២:៤០នាទីថ្ងៃត្រង់ តាមជើងហោះហើរពិសេសលេខ ZA018 បន្ទាប់ពីសម្ដេចអគ្គមហាសេនាបតីតេជោ ហ៊ុន សែន យល់ព្រមឲ្យមានការរៀបចំយន្ដហោះពិសេស សម្រាប់ការដឹកជញ្ជូនអត្តពលិកមានពិការភាពកម្ពុជា ទៅឥណ្ឌូនេស៊ី ខណៈក្រុមហ៊ុនអាកាសចរណ៍ Sky Angkor Airlines បានយល់ដឹកជញ្ជូនទៅមកដោយឥតគិតថ្លៃ ដែលត្រូវចេញដំណើរនៅថ្ងៃទី២៦ ខែកក្កដា និងវិលត្រឡប់មកមាតុភូមិវិញ នៅថ្ងៃទី០៧ ខែសីហា ឆ្នាំ២០២២។
ឯកឧត្តម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា បានបញ្ជាក់ថា ប្រតិភូកីឡាប៉ារ៉ាឡាំពិកកម្ពុជា ទៅប្រទេសឥណ្ឌនេស៊ី លើកនេះ មាន៣ប្រភេទ ដោយប្រតិភូទី១ សំដៅលើ ក្រុមអត្តពលិក និងគ្រូបង្វឹក ទៅចូលរួមការប្រកួតកីឡាអាស៊ានប៉ារ៉ាហ្គេម លើកទី១១ ហើយប្រតិភូទី២ គឺក្រុមការងារទៅរៀនសូត្រ និងដកស្រង់បទពិសោធន៍គ្រប់យ៉ាង ដើម្បីយកចំណេះដឹងមករៀបចំការប្រកួតអាស៊ានប៉ារ៉ាហ្គេម លើកទី១២ នៅកម្ពុជា និងប្រតិភូទី៣ គឺក្រុមការងារសម្តែងដើម្បីទទួលទង់សហព័ន្ធកីឡាអាស៊ានប៉ារ៉ា ក្នុងនាមកម្ពុជា ជាម្ចាស់ផ្ទះរៀបចំការប្រកួតអាស៊ានប៉ារ៉ាហ្គេម លើកទី១២ ឆ្នាំ២០២៣។
កម្ពុជា បញ្ជូន ១១ប្រភេទកីឡា ទៅចូលរួមប្រកួតរួមមាន កីឡាអត្តពលកម្ម, ហែលទឹក, បាល់ទះអង្គុយបុរស និងនារី, បាល់បោះរទេះបុរស និងនារី, បាល់បោះជនពិការភ្នែក, បាល់ទាត់៧ម្ខាង (ចលករខួរក្បាល), វាយកូនឃ្លីលើតុ, វាយសី, លើកទម្ងន់, អុក និងប៊ូស្យា ខណៈព្រឹត្តិការណ៍អាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី ចាប់ផ្ដើមពីថ្ងៃទី៣០ ខែកក្កដា ដល់ថ្ងៃទី០៦ ខែសីហា ឆ្នាំ២០២២ ដោយមានកីឡា ១៤ប្រភេទដាក់ឲ្យប្រកួត៕