មីក្រូហិរញ្ញវត្ថុ JACCS ដែលមានប្រភពមកពីប្រទេសជប៉ុន កំពុងប្រកបអាជីវកម្មនៅព្រះរាជាណាចក្រកម្ពុជា បានក្លាយជាដៃឧបត្ថម្ភថ្មីមួយទៀតសម្រាប់ក្រុមហ៊ុនបាល់ទាត់ Cambodian Premier League សម្រាប់ដំណើរការនៅឆ្នាំ២០២២ នេះ។
លោក Satoshi Saito នាយកក្រុមហ៊ុន Cambodian Premier League បានបញ្ជាក់ថា មុននឹងចុះអនុស្សរណៈយោគយល់គ្នារវាងក្រុមហ៊ុនទាំង២នៅល្ងាចថ្ងៃព្រហស្បតិ៍ ទី៤ ខែសីហា ឆ្នាំ២០២២ នៅ Raintree ក្នុងរាជធានីភ្នំពេញ ថាលោក Narita លោក Takahashi លោក Nakamura និងបុគ្គលិករបស់ JACCS បានចូលរួមទស្សនាការប្រកួតក្នុងពានរង្វាន់លីគកំពូលកម្ពុជា នៅកីឡដ្ឋាន Smart RSN ព្រមទាំងបង្ហាញពីទឹកចិត្តរំភើបនិងគាំទ្រខ្លាំង ប៉ុន្តែកាលនោះលោក Saito គិតថាជាចូលចិត្តបាល់ទាត់ធម្មតាៗប៉ុណ្ណោះ មិននឹងស្មានថាឈានដល់ការចុះ MOU ជាមួយគ្នានោះទេ។
«នៅក្នុងបាល់ទាត់យើងត្រូវការ [ការវិនិយោគ] បន្ថែមទៀតទៅលើកន្លែងកីឡាបាល់ទាត់ដូចជាកីឡដ្ឋាន កន្លែងហ្វឹកហាត់ និងឧបករណ៍ ក្លិប ការិយាល័យ និងច្រើនទៀតចំពោះអ្នកគ្រប់គ្រង អ្នកដែលគ្រប់គ្រងក្លិបបាល់ទាត់និងការប្រកួត មន្រ្តី បុគ្គលិក ហើយនឹងកីឡាករ»។ លោក Saito សង្កត់ធ្ងន់។
លោក Narita នាយកក្រុមហ៊ុនមីក្រូហិរញ្ញវត្ថុបានបញ្ជាក់ថា៖«មូលហេតុដែលយើងសម្រេចចិត្តចូលរួមឧបត្ថម្ភ CPL លើកនេះគឺដោយសារផ្តើមចេញពីលោក Saito ដែលជានាយកក្រុមហ៊ុន បុគ្គលិករបស់ CPL និងក្លិបបាល់ទាត់ទាំងអស់ដែលមានឆន្ទៈអភិវឌ្ឍន៍វិស័យបាល់ទាត់នៅកម្ពុជា។ ម្យ៉ាង យើងចង់រួមចំណែកនៅក្នុងការអភិវឌ្ឍន៍វប្បធម៌កីឡានៅកម្ពុជា ផងដែរ»។
មីក្រូហិរញ្ញវត្ថុ JACCS បានឈានជើងចូលទីផ្សារកម្ពុជា រយៈពេល៤ឆ្នាំមកហើយ មានអតិថិជនប្រមាណជិត៤ម៉ឺននាក់ ដោយផ្តោយលើគម្រោងពង្រីកសាខា និងកម្ចីផ្ទាល់ខ្លួន និងកម្ចីរថយន្តជាដើម ជាពិសេសនៅរាជធានីភ្នំពេញ និងខេត្តសៀមរាប។ បេសកកម្មរបស់ JACCS គឺ«អនាគតពោរពេញដោយក្តីស្រម៉ៃ» និង«សង្គមដែលសំបូររុងរឿង» សម្រាប់ប្រជាជនកម្ពុជា។ ពាក្យស្លោករបស់ក្រុមហ៊ុនគឺ «Seed The Future»។ ក្រុមហ៊ុនបង្កើតឡើងដំបូងតាំងពីឆ្នាំ១៩៥៤ មកម៉្លេះនៅនៅប្រទេសជប៉ុន ហើយគិតត្រឹមពេលនេះមានសាខានៅក្រៅប្រទេសដូចជា កម្ពុជា វៀតណាម ឥណ្ឌូណេស៊ី និងហ្វីលីពីន ព្រមទាំងមានបុគ្គលិកសរុបជាង៦ពាន់នាក់ផងដែរ។
ការឧបត្ថម្ភនេះគឺផ្តោតទាំងការប្រកួតពានរង្វាន់លីគកំពូលកម្ពុជា Cambodian Premier League 2022 និងពានរង្វាន់លីគទី២ Cambodian League 2។ លោក Narita បញ្ជាក់ថានឹងទិញសំបុត្រក្នុងការប្រកួតនានាសម្រាប់ផ្តល់ជូនបុគ្គលិករបស់ក្រុមហ៊ុននិងអតិថិជនខ្លួនចូលទស្សនាការប្រកួតផងដែរ។
បើតាមលោក Siato បញ្ជាក់ថាគ្រឹះស្ថានមីក្រូហិរញ្ញវត្ថុ JACCS មានទិសដៅដូចគ្នានឹង CPL គឺការគាំទ្រដ៏ល្អ រួមជាមួយអ្នកឧបត្ថម្ភផ្សេងទៀតដូចជា Metfone, Panasonic, Suzuki, Molten ជាដើម។
ក្រុមហ៊ុន CPL កំពុងតែដំណើរការប្រកួតពានរង្វាន់ Cambodian Premier League និង Cambodian League 2 ដែលចាប់យកទស្សនិកជនប្រមាណជា៤០ម៉ឺននាក់ក្នុង១សប្ដាហ៍ ហើយមានអ្នកទស្សនាតាមអនឡាញប្រមាណ១ម៉ឺនទៅ៣ម៉ឺននាក់ក្នុង១ប្រកួត ក្នុងនោះមានការបញ្ចេញមតិ (Comment) ប្រមាណ៨ពាន់និងចែករំលែក (Share) ប្រមាណ៥ពាន់លើ ហ្វេសប៊ុករបស់ខ្លួន៕