កំពូលតារាចម្រៀងសំឡេងផ្អែម មាស សុខសោភា ដែលអ្នកលេងបណ្ដាញសង្គមដាក់ឈ្មោះឱ្យជា រាជិនីធម្មជាតិ ដោយសារអ្នកនាងចូលរួមយ៉ាងសកម្មក្នុងការថែរក្សាព្រៃឈើនៅកម្ពុជានោះ ថ្មីៗនេះអ្នកនាងបានព្រលយពាក្យពិតចេញពីចិត្ត បន្ទាប់ពីតំបន់ព្រៃឈើនៅក្បែរឧទ្យានសត្វភ្នំតាម៉ៅបានសង្គ្រោះដោយរាជរដ្ឋាភិបាល។
ក្រោយមានប្រតិកម្មចំពោះសកម្មភាពនៃការដោះដូរ និងអភិវឌ្ឍតំបន់ភ្នំតាម៉ៅស្ទើតែទាំងស្រុងឱ្យទៅក្រុមហ៊ុនឯកជន ភ្លាមៗប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានសម្រេចចិត្តលុបចោល និងចេញបញ្ជា ៣ចំណុច៖
១.លុបចោលទាំងអស់នូវរាល់ការអនុញ្ញាតឱ្យធ្វើការដោះដូរនិងអភិវឌ្ឍ។
២.រក្សាទុកដីនិងព្រៃនៅជុំវិញសួនសត្វ ភ្នំតាម៉ៅជាដីដែលត្រូវការពារនិងអភិរក្ស
ដោយក្រសួងកសិកម្ម។
៣.ក្រុមហ៊ុនដែលបានឈូសឆាយត្រូវ បញ្ឈប់សកម្មភាពនិងត្រូវដាំដើមឈើ ឡើងវិញលើដីដែលបានឈូសឆាយ។សូមអរគុណចំពោះបងប្អូនជនរួមជាតិ ដែលបានចូលរួមផ្តល់យោបល់ប្រកប ដោយការស្ថាបនា។
យ៉ាងណាមិញ អ្នកនាង មាស សុខសោភា ដែលជាតារាចម្រៀងស្រឡាញ់ដើមឈើស្មើនឹងជីវិត បានប្រកាសនៅលើហ្វេសប៊ុករបស់អ្នកនាងថា ៖ «លើលោកនេះពិតជាមានព្រះនិងយុត្តិធម៏ពិតប្រាកដសំរាប់អ្នកស្មោះត្រង់និងមនុស្សល្អ នាងខ្ញុំសូមអរព្រះគុណសម្តេចពុកនិងសម្តេចម៉ែដែលបាន ស្វែងយល់និងរក្សាសន្តិភាពដោយផ្លូវវិជ្ជមានដល់ប្រជារាស្រ្តស្លូតត្រង់ #ភ្នំតាម៉ៅ»។
យ៉ាងណាមិញ គេនៅចាំបានថា រាជិនីធម្មជាតិរូបនេះធ្លាប់បានស្នើសុំដល់ប្រមុខរាជរដ្ឋាភិបាលកម្ពុជា សម្ដែង ហ៊ុន សែន ក្នុងការបង្កើតសួនឧទ្យានបានច្រើននៅក្នុងទីក្រុងភ្នំពេញ សុំប្រជាជនកម្ពុជាកុំទទួលទានសាច់សត្វព្រៃ និង ស្នើសុំកុំឱ្យបាត់បង់បឹងតាមោក ឬ កប់ស្រូវ ។ កាលណោះអ្នកនាងបានសម្តែងមតិ នៅក្នុងវេទិកាជាតិលើកទី២ ស្តីពី «ការការពារ និងអភិរក្សធនធានធម្មជាតិ» នៅវិមានសន្តិភាព នាថ្ងៃទី២២ សីហា ឆ្នាំ២០១៧៕
