ក្នុងសប្ដាហ៍ទី១៣ នៃពានរង្វាន់លីគកំពូលកម្ពុជា Cambodian Premier League បានបញ្ចប់ជុំទី២ កាលពីពេលថ្មីៗ ខណៈក្រុមគីរីវង់សុខសែនជ័យ ដែលមានមូលដ្ឋាននៅក្រុងដូនកែវ ខេត្តតាកែវ ជាក្រុមចុងក្រោយគេក្នុងចំណោមសមាជិកទាំង៨ រកបានជ័យជម្នះជាលើកដំបូងរបស់ខ្លួន។
សារព័ត៌មានត្រយង សូមលើកយកសាច់រឿងសំខាន់ៗចំនួន៥ ដែលកើតឡើងនៅក្នុងជ័យជម្នះនេះមិនសូវមានអ្នកចាប់អារម្មណ៍៖
រឿងទី១) បញ្ជីឈ្មោះក្រុមសមាជិកទាំង៨ ដែលរកបានជ័យជម្នះក្រោយឆ្លងកាត់១៤ប្រកួតដូចគ្នា មាន៖
-ព្រះខ័នរាជស្វាយរៀង ឈ្នះ១១ប្រកួត
-បឹងកេត ឈ្នះ ៨ប្រកួត
-វិសាខា ឈ្នះ៨ប្រកួត
-ណាហ្គាវើល ឈ្នះ៥ប្រកួត
-ភ្នំពេញក្រោន ឈ្នះ៤ប្រកួត
-Tiffy Army FC ឈ្នះ៤ប្រកួត
-អង្គរថាយហ្គឺរ ឈ្នះ៤ប្រកួត
-គីរីវង់សុខសែនជ័យ ឈ្នះ១ប្រកួត
រឿងទី២) កីឡាករ ជុង សុខា បង្កើតរឿងអស្ចារ្យចំនួន៤ក្នុងប្រកួតតែ១៖
-ទាត់ចូលទីលើកដំបូង៖ នេះជាគ្រាប់បាល់ដំបូងរបស់ម្ចាស់អាវលេខ៧ មួយនេះប្រចាំរដូវកាល២០២២។
-រកគ្រាប់បាល់ជ័យជម្នះដំបូង៖ រូបគេជាកីឡាករតែម្នាក់តែទាត់បញ្ចូលទីឱ្យក្រុមខ្លួនទទួលបានជ័យជម្នះ
-កីឡាករទី២របស់គីរីវង់ទាត់ចូលទី Tiffy Army FC រដូវកាលនេះ៖ កីឡាករទី១របស់គីរីវង់ទាត់ចូល Tiffy Army FC គឺកីឡាករហ្វីលីពីន OJ Porteria។
-ឈ្នះ Man Of The Match លើកដំបូង៖ រូបគេបានឈ្នះងារជាកីឡាករល្អប្រចាំការប្រកួត លើកដំបូង និងជាកីឡាករទី២របស់គីរីវង់ ដែលឈ្នះងារនេះបន្ទាប់ពីកីឡាករជប៉ុន Motohiro Kaneshiro ក្នុងជំនួបទល់ក្រុមភ្នំពេញក្រោន កាលពីសប្ដាហ៍ទី១២ កន្លងទៅ។
រឿងទី៣) ជាប្រកួតទី២ ក្នុងរដូវកាលនេះដែលមិនមានពិន័យកាតទាល់តែសោះក្នុងពានរង្វាន់ Cambodian Premier League៖ ក្រោមការកាន់កញ្ចែពីសំណាក់លោកអាជ្ញាកណ្ដាល ឃិន ឧសីហា ដែលជាអាជ្ញាកណ្ដាលចាយកាតច្រើនជាងគេបណ្ដោះអាសន្នរហូតដល់ដល់៤៦សន្លឹក បើធៀបនឹងអាជ្ញាកណ្ដាល៩រូបផ្សេងទៀត តែជំនួបរវាងគីរីវង់សុខសែនជ័យ ទទួល Tiffy Army FC មិនមានពិន័យកាតទាល់តែសោះ។
ប្រកួតដំបូងគេក្នុងរដូវកាល២០២២ ដែលមិនមានចាយកាតនោះគឺ វិសាខា ទទួលក្រុមអង្គរថាយហ្គឺរ ក្នុងសប្ដាហ៍ទី៨កន្លងទៅ ក្រោមការកាត់សេចក្តីដោយលោកអាជ្ញាកណ្ដាល ហ៊ោ ប៊ុនថង។
រឿងទី៤) គីរីវង់ រំកិលខ្លួនផុតតំបន់ក្រុមដែលទាត់ចូលទីគូប្រកួតតិចជាងគេ៖ បើទោះជាគីរីវង់ ដែលដឹកនាំដោយលោកគ្រូបង្វឹកជនជាតិអេស្ប៉ាញ Manuel Retamero នៅចំណាត់ថ្នាក់ក្រោមគេមែន ក្នុងតារាងរួម១៣សប្ដាហ៍មក ប៉ុន្តែក្រុមដែលទាត់ចូលទីគូប្រកួតបានតិចជាងគេមិនមែនក្រុមមួយនេះនោះទេ គឺជាក្រុមណាហ្គាវើល ដែលកំពុងឈរនៅតំបន់ Top4 ទើបទាត់ចូលទីគូប្រកួតបាន១៤គ្រាប់ប៉ុណ្ណោះ។
រឿងទី៥) គីរវង់សុខសែនជ័យ ជាក្រុមក្រៅតំបន់ Top4 ទី២ ដែលយកឈ្នះលើក្រុម Tiffy Army FC៖
សប្ដាហ៍ទី៣ Tiffy Army FC ០-១ ណាហ្គាវើល
សប្ដាហ៍ទី៤ Tiffy Army FC ១-៣ ព្រះខ័នរាជស្វាយរៀង
សប្ដាហ៍ទី៥ អង្គរថាយហ្គឺរ ៥-៤ Tiffy Army FC
សប្ដាហ៍ទី៦ Tiffy Army FC ០-៣ វិសាខា
សប្ដាហ៍ទី៩ Tiffy Army FC ៣-៤ បឹងកេត
រូបថត៖គីរីវង់សុខសែនជ័យ