ជំនួបសប្តាហ៍ទី១៥ រវាងក្លិបបាល់ទាត់ អង្គរថាយហ្គឺរ ទល់នឹង វិសាខា នៅថ្ងៃសៅរ៍ ទី១៣ ខែសីហា ឆ្នាំ២០២២ នេះនឹងប្រកួតដោយមិនអនុញ្ញាតឲ្យមានទស្សនិកជនចូលរួមទស្សនាប្រកួតផ្ទាល់ឡើយនៅកីឡដ្ឋានហនុមាន។
មូលហេតុដូចដែលអ្នកទាំងអស់គ្នាបានដឹងហើយថានៅក្នុងការប្រកួតមុននៅកីឡដ្ឋានហនុមាន មានអ្នកគាំទ្របានគប់ដកទឹកសុទ្ធចូលទៅក្នុងទីលានប្រកួត។ ដោយសារតែបញ្ហានេះ សហព័ន្ធកីឡាបាល់ទាត់កម្ពុជា បានចេញសេចក្តីសម្រេចមួយ ដែលនាំឲ្យក្លិបបាល់ទាត់អង្គរថាយហ្គឺរទទួលពិន័យមិនឲ្យអ្នកគាំទ្រចូលទស្សនាផ្ទាល់។
កន្លងទៅក្លិបបាល់ទាត់ Tiffy Army FC ក៏ធ្លាប់ត្រូវបាន CPL ពិន័យជាទឹកប្រាក់ និងហាមមិនឱ្យអ្នកគាំទ្រចូលរួមទស្សនាផ្ទាល់ការប្រកួតលើទឹកដីកីឡដ្ឋាន ខ.ភ.ម ចំនួន១ប្រកួតផងដែរ ជំនួបរវាង Tiffy Army vs វិសាខា កាលពីថ្ងៃទី៩ ខែមេសា ឆ្នាំ២០២២ ក្នុងសប្ដាហ៍ទី៦ ក្រោយគ្រប់គ្រងអ្នកគាំទ្រខ្លួនមិនបាន ដែលធ្វើឱ្យប៉ះពាល់ដល់មន្រ្តីរៀបចំការប្រកួត៕