នៅល្ងាចថ្ងៃទី១៦ ខែសីហា ឆ្នាំ២០២២ លោក មិត្ត សំអែល អតីតគ្រូបង្ហាត់ក្លិបបាល់ទាត់គ្រុឌបៃតង ចាប់ពីឆ្នាំ ១៩៩៧-២០០៧ ដែលបច្ចុប្បន្នក្លិបបានប្តូរឈ្មោះមកជា ក្លិបបាល់ទាត់ព្រះខ័នរាជស្វាយរៀង បានទទួលអនិច្ចកម្មក្នុងជន្មាយុ ៨៤ឆ្នាំ ដោយរោគាពាធ។
លោក មិត្ត សំអែល គឺជាអតីតកីឡាករក្រសួងការពារជាតិ និង អតីតកីឡាករជម្រើសជាតិកម្ពុជាមួយរូបក្នុងចំណោមកីឡាករជម្រើសជាតិទាំងឡាយនាទសវត្សរ៍ឆ្នាំ ៦០ និង ៧០។ ចន្លោះពេលជាប់ជម្រើសជាតិពីឆ្នាំ១៩៦៧ ដល់ ១៩៧០ លោកជាខ្សែប្រយុទ្ធម្នាក់ដែលពូកែតែតបញ្ចូលទី ពិសេសពេលណាបាល់បោះចេញពីជ្រុង។
អាជីពជាគ្រូបង្វឹកនិងដឹកនាំ
– ក្រោយឆ្នាំ ១៩៧៩ លោក មិត្ត សំអែល ក្លាយជាគ្រូបង្វឹកក្រុមបាល់ទាត់នាយកដ្ឋានអបរំកាយ និង កីឡារាជធានីភ្នំពេញ
– ឆ្នាំ១៩៨៤-១៩៨៥ ជាគ្រូបង្វឹកនៅសាលាទ័ពជើងគោកចម្រុះ
– ឆ្នាំ ១៩៨៥-១៩៨៦ ជាគ្រូបង្វឹកក្រុមអាកាសចរយោធាពោធិចិនតុង
– ឆ្នាំ១៩៨៧-១៩៨៨ ជាគ្រូបង្វឹកក្រុមបាល់ទាត់របស់ខណ្ឌ ៧មករា
– ឆ្នាំ១៩៨៩-១៩៩២ ជាគ្រូបង្វឹក យោធាភូមិភាគប្រាំ
– ឆ្នាំ១៩៩៣-១៩៩៧ ជាគ្រូកីឡាបាល់ទាត់ពិភពពាណិជ្ជ (U13-U15) និងជាស្ថាបនិកមួយរូបដែលធ្វើឲ្យបាល់ទាត់ខ្មែររស់ឡើងវិញរួមទាំងការបណ្ដុះបណ្ដាលកីឡាករវ័យក្មេងជាច្រើននាក់
– ឆ្នាំ១៩៩៨ លោកបានបង្ហាត់ និងដឹកនាំក្រុមយុវជនកម្ពុជាទៅចូលរួមប្រកួតពានរង្វាន់នៅសិង្ហបុរី
– ឆ្នាំ១៩៩៩-២០០៨ លោកបានប្រមូលកីឡាករមួយចំនួនដែលលោកធ្លាប់បណ្ដុះបណ្ដាលឲ្យទៅចូលរួមនៅក្លិបកងរាជអាវុធហត្ថលើផ្ទៃប្រទេស (PM) ឬស្វាយរៀងពេលបច្ចុប្បន្ន។
ការបណ្ដុះបណ្ដាលកីឡាករ៖
– ចាប់ពីឆ្នាំ ១៩៧៩ លោក មិត្ត សំអែល គឺជាអ្នកធ្វើឲ្យបាល់ទាត់ខ្មែរមានពន្លឺឡើងវិញ បន្ទាប់ សម័យប៉ុលពត បានបញ្ចប់។ កីឡាករដែលលោកធ្លាប់បង្ហាត់ និង បណ្ដុះបណ្ដាលដោយផ្ទាល់ដៃមានដូចជា រិទ្ធ ឌីកា, អៀង សាក់នីដា, នាង ចេនឡា, គឹម ចាន់ប៊ុណ្ណារិទ្ធ, កៅ គីរី, សំ វណ្ណដេត, រិទ្ធ កាណូ និង ឆោម វាសនា ជាដើម។
ពោលគឺលោក មិត្ត សំអែល គឺជាស្ថាបនិកមួយរូបដែលបានរៀបចំបណ្តុះបណ្តាលដល់ថ្នាលយុវជនជាច្រើនឡើងវិញក្នុងឆ្នាំ១៩៩៧ បន្ទាប់ពីក្រុមបាល់ទាត់ខ្មែរដ៏លេចធ្លោត្រូវបានបំផ្លាញដោយសារសង្គ្រាម៕
