នៅក្នុងបទសម្ភាសន៍ជាមួយនឹងកាសែត The People លោក Simon Cowell ស្ថាបនិក Variety Show ដ៏ល្បីល្បាញជាច្រើន បានលើកឡើងពាក់ព័ន្ធនឹងករណីបាត់បង់ជីវិត របស់បេក្ខជន Noland Neal ដែលស្លាប់ក្នុងរវាងកំពុងប្រកួត ធ្វើឱ្យលោកប្ដូរការគិតច្រើនក្នុងជីវិត។
«មានរឿងមិនល្អច្រើនបានកើតឡើងច្រើនឆ្នាំកន្លងមកនេះ។ ថ្ងៃមុនខ្ញុំបានគិតពីរឿងនេះដែរ។ មនុស្សយើងពិតជាស្លាប់លឿនមែន។ រាល់ពេលដែលមានមនុស្សស្លាប់ ហើយអ្នកនោះគឺជាមនុស្សដែលយើងស្គាល់ យើងពិតជាមានអារម្មណ៍ខ្លោចផ្សារណាស់។ នៅវេលានោះ គឺថា តើខ្ញុំអាចនិយាយអ្វីបាន? រឿងអាក្រក់ក់តឡើងច្រើនដង ហើយរាល់ពេលដែលវាកើតឡើង ចិត្តយើងលំបាកណាស់។»
Neal បានស្លាប់កាលពីខែមុន ក្នុងផ្ទះរបស់លោកនៅ Nashville ហើយមូលហេតុនៃការស្លាប់ត្រូវបានបងប្អូនជីដូនមួយរបស់លោក Dyland Seals ថាលោកចិត្តចុះចាញ់ចំពោះការប្រយុទ្ធប្រឆាំងនឹងការប្រើប្រាស់ថ្នាំញៀន។ ក្រៅពីជាបេក្ខជន AGT លោក Neal ក៏ធ្លាប់មានវត្តមានប្រកួតរដូវកាលទី១០នៃកម្មវិធី The Voice កាលពីឆ្នាំ២០១៦ ផងដែរ។
មែនទែនទៅ Neal មិនមែនជាបេក្ខជន America’s Got Talent ទីមួយឡើយដែលស្លាប់ក្នុងពេលកំពុងប្រកួតប្រជែង រំលឹកឡើងវិញកាលពីខែកុម្ភៈ ការប្រកួតរដូវកាលទី១៦ ម្ចាស់ប៊ូតុងមាសកម្មវិធី America’s Got Talent អ្នកនាង Nightbird ក៏បានស្លាប់ដែរក្រោយពីប្រយុទ្ធប្រឆាំងនឹងជំងឺមហារីកមួយរយៈ។អតីតបេក្ខនារីប៊ូតុងមាសវ័យ៣១ឆ្នាំ ធ្លាប់បាននិយាយប្រាប់គណៈកម្មការនៅក្នុងពេលបង្ហាញសមត្ថភាពថា គ្រូពេទ្យបានប្រាប់ថាខ្លួនមានសង្ឃឹមរស់ត្រឹមតែ២ភាគរយប៉ុណ្ណោះ។
Simon បានពោលថាក្នុងរវាង៣ឆ្នាំមកនេះ គឺជាពេលវេលាដ៏លំបាកមួយសម្រាប់ខ្ញុំ តើអ្នកគិតថាគ្រប់យ៉ាងធម្មតា? ហើយនៅពេលដែលអ្នកជួបរឿងដូច្នេះ អ្នកពិតជាលំបាកទទួលយកណាស់។ លោកបានបន្ថែមទៀតថា៖ «ប៉ុន្តែអ្វីដែលខ្ញុំអាចនិយាយបានគឺខ្ញុំបានរៀនច្រើនពីរឿងនេះ អ្នកចាំបាច់ត្រូវតែរៀនទទួលស្គាល់ ហើយព្យាយាមរស់នៅរាល់ថ្ងៃដោយគិតវិជ្ជមាន មានសុខភាពល្អ តែប៉ុណ្ណឹងទៅ ខ្ញុំធ្លាប់និយាយរឿងនេះជាមួយនឹងគេដែរ មនុស្សយើងគ្មានអ្នកណាត្រៀមខ្លួនសម្រាប់ថ្ងៃនោះដែលនឹងមកដល់ឡើយ។
នេះគឺជាលើកទីមួយហើយ ដែល Big Boss កម្មវិធីត្រកូល got talent និយាយដល់ករណីមានបេក្ខជនបានស្លា.ប់ក្នុងពេលកំពុងប្រកួតនៅក្នុងកម្មវិធីដែលខ្លួនបានរៀបចំនិងបង្កើតឡើង៕
