ក្រុមបាល់ទាត់ Young Elephants បានគ្រងតំណែងជើងឯកលីគកំពូលឡាវ (Lao League 1) ជាលើកដំបូងគិតចាប់តាំងពីបង្កើតឡើងដំបូងក្នុងឆ្នាំ២០១៧ ក្រោយប្រកួតសន្សំពិន្ទុវិលជុំចំនួន២ជើងក្នុងចំណោមសមាជិកចំនួន៧ក្រុមនៅរដូវកាលឆ្នាំ២០២២នេះ។
បើតាមការបញ្ជាក់នៅលើហ្វេសប៊ុករបស់សហព័ន្ធកីឡាបាល់ទាត់ឡាវ ក្រោយក្រុម Young Elephants លើកពានរង្វាន់នៅចុងសប្ដាហ៍កន្លងទៅនេះថាម្ចាស់ជើងឯកទទួលបានពានរង្វាន់ចំនួន១ មេដាយមាសម្នាក់១ អមដោយថវិកាលើកទឹកចិត្តចំនួន៣០០លានគីប (Kips) ឬស្មើប្រហែល១៩,៦១០ដុល្លារអាមេរិក (ហាងឆេង ១ដុល្លារ= ១៥,២៩៨.១ គីប)។
ជាមួយគ្នានេះដែរក្រុមជើងឯករង Master 7 ទទួលបានទឹកប្រាក់ ១៥០លានគីប ឬ ៩,៨១១.២០ដុល្លារអាមេរិក ហើយក្រុមលេខ៣ Ezra ទទួលបានប្រាក់រង្វាន់ ៨០លានគីប ឬ ស្មើ៥,២៣៤.៨៨ដុល្លារអាមេរិក។
ពានរង្វាន់លីគកំពូលឡាវ មានការប្រកួតសរុប៦១ប្រកួត ចាប់ផ្តើមប្រកួតពីថ្ងៃទី១២ ខែមីនា ដល់ថ្ងៃទី២០ ខែសីហា ឆ្នាំ២០២២ ខណៈកីឡាករដែលទាត់បញ្ជូលទីគូប្រកួតបានច្រើនគ្រាប់ជាងគេគឺKeoviengphet Liththideth មាន១៥គ្រាប់ របស់ក្រុម Master 7 ហើយអ្នកចាំទីល្អជាងគេបានទៅកីឡាករឡាវ Outthilath Nammakhoth របស់ក្រុម Young Elephants គ្រូបង្វឹកល្អជាងគេបានទៅលោក Satyasagara របស់ក្រុម Young Elephants និងកីឡាករ Kidavone Souvanni របស់ក្រុម Young Elephants ឈ្នះពានកីឡាករល្អប្រចាំពានរង្វាន់ផងដែរ។
ក្នុងនាមជាម្ចាស់ ជើងឯកពានរង្វាន់លីគកំពូលឡាវ ក្រុម Young Elephants មានឈ្មោះតំណាងឱ្យប្រទេសរបស់ខ្លួនចូលរួមប្រកួតក្នុងពានរង្វាន់បាល់ទាត់កម្រិតទ្វីបអាស៊ី AFC Cup 2023 ខាងមុខផងដែរ៕
