ពានរង្វាន់បាល់ទាត់ AFC Champion League 2022 តំបន់អាស៊ីភាគខាងកើត ឈានដល់វគ្គ៨ក្រុមចុងក្រោយ នៅល្ងាចថ្ងៃចន្ទ ទី២២ ខែសីហា ឆ្នាំ២០២២ នេះ ខណៈតំបន់អាស៊ីខាងលិចនឹងធ្វើការប្រកួតវគ្គ៨ក្រុមចុងក្រោយដូចគ្នានៅដើមឆ្នាំ២០២៣ខាងមុខ។
សម្រាប់កម្មវិធីប្រកួតវគ្គ៨ក្រុមចុងក្រោយតំបន់អាស៊ីខាងកើតមាន៖
-ម៉ោង២រសៀល Vissel Kobe (ជប៉ុន) ប៉ះ Jeonbuk Hyundai Motors (កូរ៉េខាងត្បូង)
-ម៉ោង៤ល្ងាច Urawa Red Diamonds (ជប៉ុន) ប៉ះ BG Pathum United (ថៃ)
ការប្រកួតនេះធ្វើឡើងនៅកីឡដ្ឋាន Saitama Stadium 2002 ក្នុងទីក្រុង Saitama ប្រទេសជប៉ុន ដែលជាទឹកដីកណ្ដាល។
អ្នកឈ្នះនៅក្នុងការប្រកួតនេះត្រូវឡើងទៅវគ្គពាក់កណ្តាលផ្ដាច់ព្រ័ត្រ ស្វែងរកអ្នកឈ្នះតែ១ក្រុមឡើងទៅវគ្គផ្ដាច់ព្រ័ត្រ រង់ចាំក្រុមខ្លាំងមកពីតំបន់អាស៊ីខាងលិច។ តំបន់អាស៊ីខាងលិច កំពុងតែស្ថិតនៅក្នុងវគ្គជម្រុះ១៦ក្រុមចុងក្រោយនៅឡើយដោយប្រកួតគ្នា២ជើង ក្នុងខែកុម្ភៈ ឆ្នាំ២០២៣ មុនបន្តស្វែងរកក្រុមខ្លាំងទៅវគ្គ៨ក្រុម, ពាក់កណ្ដាលផ្ដាច់ព្រ័ត្រនិងផ្តាច់ព្រ័ត្រ។
កម្មវិធីប្រកួតវគ្គ១៦ក្រុមចុងក្រោយនៅតំបន់អាស៊ីខាងលិចមាន៖
-Al-Hilal (អារ៉ាប៊ីសាអ៊ូឌីត) ប៉ះ Shabab Al-Ahli (អារ៉ាប់រួម)
-Al-Shabab (អារ៉ាប៊ីសាអ៊ូឌីត) ប៉ះ Nasaf Qarshi (អ៊ូបេគីស្ថាន)
-Al-Duhail (កាតារ) ប៉ះ Al-Rayyan (កាតារ)
-Al-Faisaly (អារ៉ាប៊ីសាអ៊ូឌីត) ប៉ះ Foolad (កាតារ)
ពានរង្វាន់បាល់ទាត់ AFC Champion League 2022 រៀបចំការប្រកួតជា២វគ្គគឺវគ្គជម្រុះ និងវគ្គចែកពូល ខណៈសហព័ន្ធកីឡាបាល់ទាត់អាស៊ី ក៏បែងចែកដែរ ដោយការប្រកួតធ្វើឡើងនៅ២តំបន់គឺតំបន់អាស៊ីខាងលិច និងអាស៊ីខាងកើត។ ការប្រកួតធ្វើឡើងពីថ្ងៃទី៨ខែមីនា ដល់ថ្ងៃទី២៦ ខែកុម្ភៈ ឆ្នាំ២០២៣៕