ពានរង្វាន់បាល់ទាត់លីគកំពូលកម្ពុជា Cambodian Premier League 2022 បានធ្វើដំណើរដល់ប្រកួតទី៦៨ហើយ ពោលគឺស្ថិតវគ្គសន្សំពិន្ទុជុំទី៣ ស្របពេលដែលកីឡាករជនជាតិអ៊ូបេគីស្ថាន Alisher Mirzaev របស់វិសាខា ជាកីឡាករថ្មីឈ្នះងា Man Of The Match ក្នុងចំណោមកីឡាករធ្លាប់ឈ្នះទាំង៣៦នាក់មកនេះ ឯកីឡាករកាណាដា Marcus Haber របស់ព្រះខ័នរាជស្វាយរៀង កាន់តែវ៉ាដាច់កំពូលតារាង អ្នកឈ្នះងានេះច្រើនជាងកីឡាករដទៃទៀត។
កីឡាករ Alisher Mirzaev បានបង្ហាញខ្លួនជាមួយក្រុមវិសាខា ក្នុងការដោះដូរកីឡាករជុំទី២ ក្រោយចាកចេញពីក្រុមខេត្តព្រៃវែង ហើយរូបគេឈ្នះ MOTM នៅក្នុងប្រកួតសប្ដាហ៍ទី១៧ ទល់ក្រុមគីរីវង់សុខសែនជ័យ។ រូបគេជាកីឡាករដំបូងគេដែលឈ្នះ MOTM ទាំងក្នុងពានរង្វាន់លីគកំពូលកម្ពុជា និងពានរង្វាន់លីគទី២ ក្នុងរដូវកាលតែ១ផងដែរ។
ចំណែកកីឡាករ Marcus Haber វិញជាអ្នកឈ្នះ MOTM ច្រើនជាងគេ ដោយក្នុងនោះឈ្នះនៅសប្ដាហ៍ទី៤, ទី៦, ទី១០, ទី១២, ទី១៣ និងទី១៧។ ចំពោះអ្នកឈ្នះច្រើនផ្សេងទៀត តាមពីក្រោយមាន សុះ ស៊ូហាណា (ណាហ្គាវើល), Lee Jae Gun (វិសាខា), Gabriel Silva (អង្គរថាយហ្គឺរ), Takumu Nishihara (Tiffy Army FC) ម៉ាត់ ណូរ៉ុន (បឹងកេត) ឈ្នះ បានម្នាក់៤លើក។