ប្រភេទតន្ត្រីបែប Hip-Hop បានចាប់កំណើតនៅថ្ងៃទី 11 ខែសីហា ឆ្នាំ 1973 ដោយ DJ ម្នាក់ឈ្មោះ Kool Herc ។ គាត់បានរៀបចំពិធីជប់លៀងមួយមានឈ្មោះថា Back-to-School ធ្វើឡើងនៅ 1520 Sedgwick Avenue ដែលជាអគារផ្ទះល្វែងមួយកន្លែង វាមានទីតាំងនៅសង្កាត់ Bronx នៃទីក្រុងញូវយ៉ក។ ហើយពីចំណុចនេះឯង បានក្លាយជាចំណុចចាប់ផ្តើម ដែលបណ្តាលឱ្យមានបដិវត្តន៍នៃវិស័យតន្ត្រីថ្មី។
ក្នុងអំឡុងពេលនៃកម្មវិធី គាត់បានបង្កើតនូវបរិយាកាសមួយថ្មីខុសប្លែកពិមុន ដោយគាត់បានយកឧបករណ៍ចាក់ឌីសចំនួន២ មកបើកឆ្លាស់គ្នាទៅវិញទៅមក បង្កើតបានជាសំឡេង Mix ជាមួយនឹងគាត់និយាយ ថែមទាំងមានវគ្គ Break ដែលមានសំឡេងតន្ត្រីកាន់តែវែងឡើង ជួយឱ្យអ្នកនិយមរាំបានរាំកាន់តែយូរថែមទៀត។
ក្នុងពេលដែល Kool Herc កំពុងបើកចម្រៀង មិត្តរបស់គេ Coke La Rock ក៏បានបញ្ចេញសំឡេងច្រៀងតាមរយៈមេក្រូហ្វូន កណ្ដាលចំណោមមនុស្សដែលកំពុងតែរាំលេងកម្សាន្តយ៉ាងរីករាយ ដោយហេតុនេះហើយតន្ត្រីបែប Hip Hop ក៏បានចាប់កំណើតឡើង។
ក្រោយមកទៀតចម្រៀងមានលក្ខណៈបែបនេះត្រូវគេហៅថា Break Dance ដើម្បីបង្កើនភាពរីករាយកាន់តែខ្លាំងទ្វេរដង ពិធីករក៏បានបន្ថែមប៉ារ៉ូលច្រៀងដើម្បីបូកផ្សំជាមួយនឹងចង្វាក់តន្ត្រីបែប Hip Hop ដែលធ្វើឱ្យបទចម្រៀងស្ដាលយ៍ថ្មីនេះមានប្រជាប្រិយភាពក្នុងស្រទាប់មហាជនខ្លាំង រហូតប្រែក្លាយជាវប្បធម៌តន្ត្រី Hiphop ដោយចង្វាក់ Hip Hop នេះ តម្រូវឱ្យមានដូចជា៖
DJ ចាក់់ឌីស
មាន MC ជា Rapper ចាំដំណើរការកម្មវិធីដើម្បីផ្ដល់ភាពសប្បាយរីករាយដល់អ្នកចូលរួម
ចង្វាក់តន្ត្រីកន្ត្រាក់អារម្មណ៍
មានការរាំបែប B-Boy
ការតុបតែងខ្លួនបែប Fashion
មានលាយឡំសិល្បៈ គូរលើជញ្ជាំង ឬ លាបលើជញ្ជាំង
តើ តន្ត្រី Hip Hop និង Rap មានភាពខុសប្លែកគ្នាត្រង់ចំណុចណាដែរ?
តន្ត្រី Hip Hop គឺជាចង្វាក់តន្ត្រីមួយប្រភេទដែលគេនិយមទូលំទូលាយ មានឥទ្ធិពលចំពោះជីវិតមនុស្សដែលចូលចិត្តតន្ត្រីប្រភេទនេះ រហូតមានការលើកតម្កើងឱ្យក្លាយជាវប្បធម៌ Hip-Hop ចំណែក Rap ប្រៀបដូចជាការសូត្រកំណាព្យ ដែលមានផ្សំពាក្យចុងជួន ហើយសូត្រលឿន ផ្សំដោយចង្វាក់តន្ត្រីដើម្បីបន្ថែមភាពសប្បាយរីករាយ ទើបគេចាត់ទុកថា Rap គឺជាផ្នែកមួយនៃវប្បធម៌ Hip Hop។
Hip Hop ដំបូងឡើយគឺសំដៅដល់តន្ត្រីរបស់ជនជាតិស្បែកខ្មៅ ដែលមានការផ្សំបញ្ចូលគ្នារវាងតន្ត្រីតាមបែប Jamaica, R&B, Funk, Soul ដោយផ្ដោតសំខាន់លើ Percussion និង Beat។
ចំណែកអត្ថន័យមួយទៀត Hip-Hop គឺជាវប្បធម៌ និងវិធីជីវិតរបស់មនុស្សក្នុងសង្គមដែលកើតឡើងមកជាមួយនឹងតន្ត្រីមិនថាជា DJ ការរាំ Break Dance ការតុបតែងកាយ រួមទាំងសិល្បៈគូរលើជញ្ជាំងជាដើម។ ការពេញនិយមតន្ត្រី Hip-Hop មានការផ្សព្វផ្សាយទៅកាន់ទ្វីបជាច្រើន មិនថាជាទ្វីប អាស៊ី ទ្វីបអាហ្វ្រិច និងទ្វីបផ្សេងៗទៀត។
រីឯចង្វាក់ Rap គឺជាតន្ត្រីបែប Rhythm and Blues មួយប្រភេទ បូករួមនឹងការអត្ថបទកំណាព្យដែលមានអត្ថន័យដកស្រង់ពីជីវិតមកដាក់បញ្ចូល Rap អាចនិយាយមួយបែបទៀតគឺជាចង្វាក់ដែលកំលាយខ្លួនពីចម្រៀង Disco ប៉ុន្តែមានចង្វាក់ដែលកន្ត្រាក់អារម្មណ៍ជាង ចំណែកអត្ថន័យរបស់បទត្រូវតែមាននិងមានចុងជួន។