កីឡាករខ្មែរ-អាមេរិក Nick Taylor ត្រូវបានលោក Keisuke Honda កោះហៅចូលក្នុងក្រុមជម្រើសជាតិកម្ពុជា នឹងធ្វើដំណើរមកដល់អាកាសយានដ្ឋានអន្តរជាតិរាជធានីភ្នំពេញ នាវេលាម៉ោង៣រសៀលថ្ងៃព្រហស្បតិ៍ ទី១៥ ខែកញ្ញា ឆ្នាំ២០២២ នេះ ក្រោយរូបគេធ្វើដំណើរមកពីសហរដ្ឋអាមេរិក នៅរសៀលថ្ងៃពុធ ម្សិលមិញ។
កីឡាករជម្រើសជាតិកម្ពុជា ចំនួន២៤នាក់ ត្រូវបានសហព័ន្ធកីឡាបាល់ទាត់កម្ពុជា ប្រកាសបង្ហាញបញ្ជីឈ្មោះជាផ្លូវការនៅព្រឹកថ្ងៃពុធ នេះដោយមានកីឡាករ Nick Taylor ផងដែរ។ កីឡាករវ័យ ២៤ឆ្នាំ បច្ចុប្បន្នប្រកបអាជីពនៅក្រុម Orlando City B ក្នុងពានរង្វាន់ MLS Next Pro របស់សហរដ្ឋអាមេរិក។
អត្ថបទពាក់ព័ន្ធ៖Nick Taylor ជាប់តេស្តកម្លាំង 30-15 IFT ដោយស្វ័យប្រវត្តិ ក្រោយមានការយោគយល់ពី FFC
«យើងរំពឹងថាគាត់ (Nick Taylor) មកទាន់ការហ្វឹកហាត់របស់ក្រុមជម្រើសជាតិកម្ពុជា នៅល្ងាចនេះ»។ នេះជាការលើកឡើងរបស់លោក ឈូក ពិសិដ្ឋ អ្នកចាត់ការក្រុមជម្រើសជាតិកម្ពុជា ប្រាប់មកក្រុមការងារសារព័ត៌មានត្រយង។
ក្រុមជម្រើសជាតិកម្ពុជាត្រូវប្រមូលផ្តុំពីល្ងាចថ្ងៃពុធ នេះតទៅហើយ នៅទីលានពហុកីឡដ្ឋានជាតិមរតតេជោ ក្នុងរាជធានីភ្នំពេញ ដើម្បីត្រៀមប្រកួតមិត្តភាពអន្តរជាតិជាមួយក្រុមជម្រើសជាតិបង់ក្លាដេស វេលាម៉ោង៧យប់នៅថ្ងៃទី២២ ខែកញ្ញា ឆ្នាំ២០២២ ខាងមុខ។
បើតាមកាលវិភាគនៃការហ្វឹកហាត់ថ្ងៃដំបូងរបស់ក្រុមជម្រើសជាតិកម្ពុជា ដែលផ្តល់មកកាន់អ្នកសារព័ត៌មានជាផ្លូវការនោះ នឹងចាប់ផ្តើមហ្វឹកហាត់ពីម៉ោង៥:៣០នាទីល្ងាចរហូតដល់ម៉ោង៧យប់ ខណៈក្រុមជម្រើសជាតិកម្ពុជា ក្រោមអាយុ២៣ឆ្នាំត្រូវហ្វឹកហាត់មុនគឺចាប់ពីម៉ោង៤ដល់ម៉ោង៥:៣០នាទីល្ងាច៕
