ក្រុមបាល់ទះជម្រើសជាតិកម្ពុជា គ្រោងប្រកួតមិត្តភាពអន្តរជាតិ ចំនួន២ប្រកួតនៅក្នុងខែតុលា ឆ្នាំ២០២២ ខាងមុខ ដើម្បីត្រៀមខ្លួនពង្រឹងបច្ចេកទេសក្រុម មុនធ្វើជាម្ចាស់ផ្ទះក្នុងព្រឹត្តិការណ៍កីឡាស៊ីហ្គេមឆ្នាំ២០២៣ខាងមុខ។
លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានបញ្ជាក់ប្រាប់អ្នកសារព័ត៌មានថ្មីៗនេះ ថាក្រៅពីប្រកួតមិត្តភាពអន្តរជាតិ ជាមួយក្រុមបាល់ទះជម្រើសជាតិសិង្ហបុរី ម្ចាស់ផ្ទះកម្ពុជា កំពុងតែអញ្ញើញក្រុមមកពីគុយបា ដើម្បីប្រកួតមិត្តភាពផងដែរ។
«តាមរយៈលោកជំទាវ Liurka Rodríguez Barrios ឯកអគ្គរដ្ឋទូតគុយបា យើងកំពុងធ្វើកិច្ចប្រតិបត្តិការឱ្យមានការរៀបចំការប្រកួតមិត្តភាពរវាងក្រុមមកពីគុយបា ជាមួយក្រុមបាល់ទះជម្រើសជាតិកម្ពុជា ផងដែរ នៅអំឡុងខែតុលា ខាងមុខ ពោលគឺស្របពេលនឹងការរៀបចំពានរង្វាន់បាល់ទះសម្តេចអគ្គមហាសេនាបតីតេជោ ហ៊ុន សែន ឆ្នាំ២០២២»។ លោកអគ្គលេខាធិការបន្ថែម។
អត្ថបទពាក់ព័ន្ធ៖បាល់ទះកម្ពុជាទាំងក្នុងសាលនិងឆ្នេរខ្សាច់ ប្រកាសនាំចូលគ្រូគុយបា រហូតដល់ចប់ស៊ីហ្គេម២០២៣
នេះជាសកម្មភាពដំបូងរបស់ក្រុមជម្រើសជាតិកម្ពុជា លើឆាកអន្តរជាតិ ក្រោយពីដណ្តើមបានមេដាយសំរឹទ្ធិ ក្នុងព្រឹត្តិការណ៍កីឡាស៊ីហ្គេមលើកទី៣១ នៅទីក្រុងហាណូយ ប្រទេសវៀតណាម កាលពីខែឧសភា ឆ្នាំ២០២២ កន្លងទៅ។ បើតាមលោកបណ្ឌិត អាំង សិរីពិសិដ្ឋ ក្រុមជម្រើសជាតិកម្ពុជា ក៏គ្រោងចេញទៅប្រកួតមិត្តភាពអន្តរជាតិ នៅតាមបណ្តាប្រទេសមួយចំនួន មុនស៊ីហ្គេមឆ្នាំ២០២៣ មកដល់៕