ខ្សែប្រយុទ្ធចាស់វស្សា Cristiano Ronaldo សមាជិករបស់ក្លិបបាល់ទាត់បិសាចក្រហម Manchester United និងក្រុមជម្រើសជាតិព័រទុយហ្គាល់ បានកំណត់គោលដៅមុនចូលនិវត្តន៍ពីអាជីពជាកីឡាករបាល់ទាត់ ក្រោយប្រឡុកក្នុងវិស័យបាល់ទាត់អស់រយ:ពេល២០ឆ្នាំគត់។
គោលបំណងសំខាន់របស់ខ្សែប្រយុទ្ធវ័យ៣៧ឆ្នាំរូបនេះគឺលេងពានរង្វាន់ Euro 2024 ដែលអាល្លឺម៉ង់នឹងធ្វើជាម្ចាស់ផ្ទះ ក្រោយចប់ព្រឹត្តិការណ៍ FIFA World Cup 2022 នៅប្រទេសកាតារចុងឆ្នាំនេះ។
Cristiano Ronaldo បានថ្លែងដូច្នេះថា៖«ដំណើររបស់ខ្ញុំមិនទាន់បញ្ចប់ទេ ពោលគឺនៅវែងឆ្ងាយណាស់ ខ្ញុំគិតថាឥឡូវនេះ ខ្ញុំនៅតែត្រូវបានជ្រើសរើសលេងក្នុងចំណោមកីឡាករក្មេងៗជាច្រើនដទៃទៀត ដូចនេះខ្ញុំចង់ក្លាយជាផ្នែកមួយនៅព្រឹត្តិការណ៍ World Cup 2022 ក៏ដូចជាប្រកួត Euro 2024 ថែមទៀតផង»។
បច្ចុប្បន្នក្នុងក្រុមជម្រើសជាតិព័រទុយហ្គាល់ មានតែ Ronaldo ប៉ុណ្ណោះដែលអាចរកគ្រាប់បាល់បានច្រើនជាងគេ ពោលគឺបង្ហាញខ្លួនបាន ១៨៩ប្រកួត ស៊ុតបញ្ចូលទីបាន ១១៧គ្រាប់ ជាប់ជាកីឡាករឈ្នះពាន Best National Scorer៕