«បើខ្ញុំទៅបួស…ខ្ញុំនឹងទៅបួសនៅក្នុងបូព៌ បងប្អូនតែងស្គាល់ហែហូរ ទឹកដីអង្គរដ៏ល្អអស្ចារ្យ» ឃ្លាចម្រៀងខ្លីដកស្រង់ចេញពីបទចម្រៀងនិពន្ធថ្មី បទ «ព្រះមហាវិមលធម្ម ពិន សែម» កំពុងតែទទួលបានការសាទរនិងកោតសរសើរពីសំណាក់អ្នកប្រើប្រាស់បណ្ដាញសង្គម ព្រោះជាបទចម្រៀងដំបូងដែលមានអត្ថន័យនិងឃ្លោងឃ្លាសរសើរដល់ព្រះសង្ឃ។
សូមអានអត្ថបទ៖ ពូកែអត់គេហៅឡើងឆាក បូទី ចាប់ យឿន ពិសី មក Cover មួយបទ ហ្វេនសរសើរព្រាត!
កាលពីថ្ងៃទី២៦ ខែកញ្ញា ឆ្នាំ២០២២ បុរសសង្ហាមុខខ្មែរអង្គរ បានបញ្ចេញបទចម្រៀងថ្មីនៅលើផេករបស់ខ្លួន ដែលស្នាដៃចម្រៀងថ្មីនេះ គឺជាបទដែលនិពន្ធទំនុកច្រៀង និពន្ធបទភ្លេង និងច្រៀងដោយ បូទីផ្ទាល់តែម្ដង។
បូទី បានរៀបរាប់ពីចំណាប់អារម្មណ៍របស់ខ្លួនជាមួយនឹងការបង្ហោះបទចម្រៀងនេះថា៖ «ខ្ញុំសប្បាយចិត្តណាស់ ដែលឃើញបងប្អូន ស្រលាញ់និងគាំទ្របទបែបនេះ ព្រោះតែចង់ឱ្យប្រជាពលរដ្ឋខ្មែរយើង គោរពព្រះពុទ្ធសាសនាឱ្យបានល្អ ព្រោះឥឡូវនេះខ្ញុំមើលឃើញថា យុវវ័យសម័យថ្មីនេះ មួយចំនួនធំ ប្រព្រឹត្តអំពើបាប ប្រាសចាកពីពុទ្ធសាសនាខ្លាំងណាស់ ខ្ញុំបាទ បូទី សូមជូនពរដល់បងប្អូនទាំងអស់គ្នាពីចម្ងាយ មិនថាបងប្អូនខ្មែរ រស់នៅក្នុងប្រទេស ឬក្រៅប្រទេស និងជុំវិញពិភពលោកនេះ សូមឱ្យបងប្អូនយើងទាំងអស់គ្នាជួបតែសំណាងល្អ សុខភាពល្អគ្រប់ៗគ្នា សាធុ សាធុ»
ក្រោយពីចម្រៀងដែលលើកសរសើរពីមហាវីរភាពរបស់ព្រះមហាវិមល ពិន សែម ត្រូវបានបង្ហោះចែកចាយជាសាធារណៈ សង្កេតឃើញថាមហាជនមានការពេញចិត្តយ៉ាងខ្លាំង រហូតមានការចែករំលែក (Share) 1K ចំនួនចូលចិត្ត (Like) 5.8K។ បើក្រឡេកមើលសាធារណមតិឯណោះវិញឃើញថាមានតែពាក្យសរសើរចំពោះ បូទី ដែលអាចនិពន្ធទំនុកច្រៀងយ៉ាងពីរោះ ប្រកបដោយអត្ថន័យល្អថែមទៀត។ ប៉ុន្តែក្នុងនោះក៏មានមតិកែលម្អរខ្លះៗចំពោះការប្រើប្រាស់សង្ឃស័ព្ទ ដែលមានកំហុសឆ្គងតិចតួច ដូចជាពាក្យ «ទ្រង់» មិនប្រើសម្រាប់សង្ឃទេ គេត្រូវប្រើពាក្យថា «លោក» ទើបត្រឹមត្រូវ ជាដើម។ល។ ក្នុងនោះក៏មានអ្នកចង់ឱ្យ បូទី កែប្រែចំណុចខុសឆ្គងត្រង់ពាក្យពេចន៍ខាងលើនេះវិញ ដើម្បីឱ្យបទនេះកាន់តែល្អគ្មានចំណុចខ្វះចន្លោះថែមទៀត។
សូមស្ដាប់បទចម្រៀង «ព្រះមហាវិមលធម្ម ពិន សែម» ខាងក្រោមនេះ៖
