«…ចំណុចទី២ គឺជាវិធានការពង្រឹងក្រមសីលធម៌នៃការប្រកួត ! ហេតុអ្វីទៅ? ដោយសារតែបញ្ហាការប្រកួត យើងឃើញថាមានសោកនាដកម្ម នៃការប្រកួតបានកើតមានឡើង ជាពិសេសថ្មីៗនេះនៅប្រទេសឥណ្ឌូណេស៊ី អំពីហិង្សានិងការរត់ជាន់គ្នាស្លាប់ នៅអឺរ៉ុប និងនៅទ្វីបដទៃក៏មានព្រឹត្តិការណ៍បែបនេះកើតឡើងដែរ»។ នេះជាប្រសាសន៍របស់សម្តេចតេជោ ហ៊ុន សែន ក្នុងពិធីបើកមហាសន្និបាតក្រុមប្រឹក្សាអូឡាំពិកអាស៊ីលើកទី៤១ (41st OCA GENERAL ASSEMBLY)នៅសណ្ឋាគារសុខាភ្នំពេញ រាជធានីភ្នំពេញ ព្រឹកថ្ងៃអង្គារ ទី៤ ខែតុលា ឆ្នាំ២០២២នេះ។
សម្តេចបញ្ជាក់នៅមុខថ្នាក់ដឹកនាំកីឡាមកពីប្រទេសជាសមាជិកទាំង៥៥ប្រទេសថា៖«ដូច្នេះជាការចាំបាច់ ក្នុងការពង្រឹងក្រមសីលធម៌ អំពីការប្រកួត ដែលមិនមែនដើម្បីការឈ្នះ ក៏ប៉ុន្តែរំលោភបំពានលើលក្ខខណ្ឌនៃការប្រកួត ឬ ប្រើហិង្សានោះទេ។ ប្រសិនបើតំបន់អាស៊ីរបស់យើងមានភាពទន់ខ្សោយខាងកីឡាក៏ដោយចុះ ប៉ុន្តែយើងមិនត្រូវទន់ខ្សោយខាងការគ្រប់គ្រងការរៀបចំកីឡានោះទេ»។
សូមបញ្ជាក់ថានេះជាលើដំបូងហើយដែលប្រទេសកម្ពុជា ទទួលបានសិទ្ធិរៀបចំធ្វើជាម្ចាស់ផ្ទះមហាសន្និបាតក្រុមប្រឹក្សាអូឡាំពិកអាស៊ី គឺនៅលើកទី៤១ (41st OCA GENERAL ASSEMBLY) ខណៈមានរបៀបវារៈច្រើនត្រូវបានដាក់លើតុឱ្យប្រទេសជាសមាជិកសម្រេចក្នុងមហាសន្និបាតនេះ។
មហាសន្និបាតក្រុមប្រឹក្សាអូឡាំពិកអាស៊ី គឺជាព្រឹត្តិការណ៍ដ៏មានសារៈសំខាន់សម្រាប់ការជជែកពិភាក្សាលើព្រឹត្តិការណ៍កីឡាអូឡាំពិកអាស៊ី ហើយត្រូវបានធ្វើឡើងជារៀងរាល់ឆ្នាំ។ លើកនេះ មហាសន្និបាត មានប្រតិភូផ្នែកកីឡាប្រមាណ ៣៣៦រូប មកពី ៥៥ប្រទេសជុំវិញពិភពលោក។ ក្នុងនោះមានប្រតិភូមកពីបណ្តាប្រទេសក្រុមប្រឹក្សាអូឡាំពិកអាស៊ី ចំនួន ៤៥ប្រទេស ព្រមទាំងប្រទេសចលនាអូឡាំពិកអន្តរជាតិ ចូលរួមសង្កេតការណ៍ប្រមាណ ១០ប្រទេសទៀត។ ជាមួយគ្នានោះ ក៏មានប្រតិភូថ្នាក់ដឹកនាំគណៈកម្មាធិការអូឡាំពិកអន្តរជាតិមួយចំនួនទៀតផងដែរ៕