ប៉ុន្មានថ្ងៃនេះ នៅក្នុងរង្វង់អ្នកដើរម៉ូដនិងបង្ហាញម៉ូដ មានផ្ទុះចេញនូវរឿងរ៉ាវចម្រូងចម្រាស់ពាក់ព័ន្ធនឹងករណី Casting អស់លុយ ដោយក្នុងនោះកញ្ញា ប៊ី សុធារី បានចេញមករិះគន់យ៉ាងចំហ ប៉ុន្តែមិនបានផ្ដោតទៅលើបុគ្គលណាម្នាក់ឡើយ។ ដោយឡែក លោក Oliva Kong ក៏បានចេញមកបង្ហាញពីចំណាប់អារម្មណ៍ខ្លួន ទៅលើករណីដ៏ក្ដៅគគុកនេះដែរ។
កញ្ញា ប៊ី សុធារី ដែលជាតារាម៉ូដែលប្រឡូកក្នុងវិស័យនេះយូរឆ្នាំបានបង្ហាញប្រតិកម្មមិនពេញយ៉ាងខ្លាំង ក្រោយដឹងថាមានកម្មវិធី Casting មួយ តម្រូវឱ្យអ្នកចូលរួមត្រូវទិញពាក្យក្នុងតម្លៃ១$ ដោយកញ្ញាលើកឡើងថាតាំងពីខ្លួនប្រឡូកក្នុងវិស័យនេះទាំងខ្មែរនិងបរទេសមិនដែលចំណាយប្រាក់១កាក់នោះឡើយ។
បន្ទាប់ពីមានការរិះគន់ទៅលើកម្មវិធី Casting នោះ ពីសំណាក់កញ្ញា ប៊ី សុធារី ស្រាប់តែនៅក្នុងថ្ងៃទី៥ ខែតុលា នេះលោក Oliva Kong បានចេញមកបង្ហាញពីអារម្មណ៍របស់ខ្លួន ដែលគ្រាន់តែក្រឡេកភ្នែកក៏អាចដឹងបានថា កម្មវិធីដែលមានការលើកឡើងនោះ គឺជាកម្មវិធីដែលបុរសមានឥទ្ធិពលក្នុងវិស័យ Fashion រូបនេះជាអ្នករៀបចំ។
ពាក្យសម្ដីតបតដែលមិនបណ្ដាក់មាត់របស់លោក Oliva Kong មានខ្លឹមសារទាំងស្រុងយ៉ាងដូច្នេះ៖
ចិត្តស្ងប់តែងតែធ្វើឲ្យមានសុខភាពល្អ រីឯចិត្តច្រណែននិន្ទា ប្រៀបដូចជាមហារីកនៅក្នុងខួរឆ្អឹង។គេរស់នៅបែបគេ យើងរស់នៅបែបយើង ឃើញគេជោគជ័យឬមានបានជាងខ្លួនកុំច្រណែនគេណា បែងចែកឲ្យដាច់រវាង Business & សប្បុរសធម៌។សម្រាប់ខ្ញុំ Okay Casting break the rule ជិត2000នាក់មិនយកប្រាក់ប៉ុន្តែក្រុមហ៊ុនគេជាក្រុមហ៊ុន Business គេចំណាយគេត្រូវការចំណូលជារឿងធម្មតា ទាស់ខុសត្រង់ណាជួយប្រាប់ផង គេមិនបានបង្ខំឬចាប់ជំរិតអ្នកទាំងអស់គ្នានោះទេ 1$ វាមិនច្រើនឡើយ។ Casting របស់ខ្ញុំលើកក្រោយគឺពាក្យមួយ3$ ឬ5$ អ្នកមកឬ មិនមកជារឿងធម្មតា ពីព្រោះកម្មវិធីរបស់ខ្ញុំដើរបានលុយ មិនមែនដើរស្ម័គ្រចិត្តនោះទេ ដើរបានឱកាសហើយដើរបានលុយទៀត មានចំណូលទើបមានចំណាយ។ ត្រូវចាំថាខ្ញុំធ្វើកម្មវិធីគឺលុយផ្ទាល់ខ្លួន ខ្ញុំមិនត្រូវការSponsor គ្រឿងស្រវឹងទេ។ 1$ វាក្ដៅក្រហាយរឿងគេប៉ិននឹង បើខ្ញុំលក់ពាក្យ3$ ឬ 5$ វិញវាក្ដៅចិត្តប៉ុនណាទេ បើអ្នកចិត្តចង្អៀតចង្អល់កុំសង្ឃឹមថាវិស័យហ្វេសសិនស្រុកខ្មែររីកចម្រើនឲ្យសោះ រៀនរស់នៅដោយគិតវិជ្ជមាន កុំតែស្ករតាមគ្នាពេក អ្នកត្រូវចាំថាក្នុងវិស័យហ្វេសសិនអ្នកមិនអាចគេចផុតពីខ្ញុំឡើយពេលនេះអត់ ប៉ុន្តែថ្ងៃបន្ទាប់គឺជាអ្នក
Oliva Kong #OlivaKongសូមអគុណអ្នកគ្រប់យ៉ាងដែលតែងតែធ្វើជាកញ្ចក់ឆ្លុះបញ្ចាំងខ្ញុំបាទឲ្យបានរីកចម្រើននឹងនៅតែបន្តក្ដីស្រម៉ៃដូចសព្វថ្ងៃនេះ។
បើមើលតាមសម្ដី លើកឡើងរបស់លោក Oliva Kong ខាងលើនេះគឺ ចង់ដាស់ស្មារតីចំពោះអ្នករិះគន់លោកថា ថ្ងៃណាមួយនៅក្នុងវិស័យហ្វេសសិន ទោះចង់ឬមិនចង់ ប្រាកដជាជួបលោក ដូច្នេះមិនអាចគេចគ្នាផុតនោះឡើយ។ ប៉ុន្តែលោកក៏បានអរគុណមតិយោបល់ទាំងអស់ដែលធ្វើឱ្យលោកមានភាពរីកចម្រើននិងមានកម្លាំងចិត្តក្ដីស្រមៃខ្លួនដូចសព្វថ្ងៃ។
ងាកមកអ្នកគាំទ្រ និង ហ្វេនរបស់លោក Oliva Kong វិញ បានបញ្ចេញយោបល់យល់ស្របចំពោះការលើករបស់លោក និងលើកទឹកចិត្តឱ្យលោកបន្តធ្វើការងារលើវិស័យនេះជាបន្តទៀត ដើម្បីជួយឱ្យវិស័យដើរម៉ូដនៅកម្ពុជាកាន់តែមានភាពរីកចម្រើនដើរទាន់បរទេស៕
